18.06.2011 Тәүге полиолимпиада еңеүселәре тәбрикләнДе
Быйыл беренсе тапҡыр ойошторолған республика «Орбита» полиолимпиадаһы Республика башҡорт лицей интернатында 5-се, 6-сы синыф уҡыусыларын йыйҙы. Башҡортостандың төрлө район һәм ҡалаларынан килгән 1151 уҡыусы математика, логика, башҡорт, рус һәм инглиз теле, тәбиғәт фәндәре буйынса үҙ-ара көс һынашты.
Олимпиада тест рәүешендә ойошторолғайны. Ул ижади ҡарашлы, талантлы уҡыусыларҙы асыҡлау, фәнни һәм тикшеренеү эшенә ҡыҙыҡһыныуҙарын арттырыу, республика конкурсына төрлө район уҡыусыларын йәлеп итеү маҡсатында уҙғарыла.
Олимпиада тәүге тапҡыр ғына уҙғарылһа ла, бик күп уҡыусыны йыйҙы. Унда 5-се синыфтар араһынан – 490, 6-сы синыфтарҙан 661 уҡыусы ҡатнашты.
Жюри составы 60 призерҙы һәм төп еңеүселәрҙе билдәләгәндән һуң, уларҙы тәбрикләү тантанаһы үтте. Байрамда уҡыусыларҙың ата-әсәләре лә ҡатнашты.
5-се синыфтар араһында Күгәрсен районының Мораҡ башҡорт гимназияһы уҡыусыһы Аделина Кинйәбаева еңеүсе тип табылды. Уға бүләк фотоаппаратты БР Мәғариф министрлығының махсус белем биреү һәм балалар хоҡуҡтарын яҡлау бүлеге мөдире Динә Шәрипова тапшырҙы.
6-сы синыфтар араһында Әлшәй районының Раевка башҡорт лицейынан Азат Юлдашевҡа етеүсе булманы. Йәш егеттең белеме нетбук менән баһаланды. Бындай бүләк менән уны физика һәм математика фәндәре докторы, БДУ-ның теоретик физика кафедраһы профессоры, «Орбита» республика полиолимпиадаһының жюри рәйесе Евгений Екомасов тәбрикләне.
Бүтән еңеүселәр ҙә бүләкһеҙ ҡалманы. Уларға дискылар өсөн сумкалар, компьютер кәрәк-яраҡтары бирелде.
Уҡыусылар олимпиаданан дәрт алып, үҙ көстәрен һынап ҡына түгел, әллә күпме яңы дуҫ, таныш табып таралышты.
Р. ДӘҮЛӘТОВА.