11.12.2010 Уҡытыусылар өҫтәмәгә иҫәп тота ала
Башҡортостан уҡытыусыларының эш хаҡы 2011 йылда 18 процентҡа артыуы ихтимал.
Был турала БР Дәүләт Йыйылышы – ҡоролтай Рәйесе Константин Толкачевтың уҡытыусылар – Башҡортостандың муниципаль берәмектәре вәкәләтле органдары депутаттары менән осрашыуында республика мәғариф министры урынбаҫары Владимир Аристархов белдерҙе. Уның һүҙҙәренә ҡарағанда, өс йылда педагогтарҙың килеме бер ярым тапҡырға артһын өсөн 2012 һәм 2013 йылдарҙа ла эш хаҡын ошондай уҡ күләмдә арттырыу планлаштырылған.
– Социаль йүнәлештәге сәйәсәт мәғариф өлкәһе хеҙмәткәрҙәренең матди хәлен яҡшыртырға булышлыҡ итәсәк, – тине Владимир Аристархов. – Киләһе йылдарҙа шулай уҡ йәш уҡытыусыларҙың торлаҡ шарттары ла яҡшыртыласаҡ. Был маҡсаттарға республика бюджетынан 2011 йылда – 17 миллион һум самаһы, 2012 йылда – 30 миллиондан ашыу, 2013 йылда 50 миллион һумдан ашыу аҡса бүлергә планлаштырыла.
Владимир Аристархов билдәләүенсә, йәш педагогтарға социаль ярҙам күрһәтеү өсөн республикала яңы грант системаһы ла эшләнгән.