04.09.2012 «Гений» Мавроди рәсәйҙәрҙе тағы ла төп башына ултыртты
Ижевск ҡалаһында МММ-2011 проектына дәғүә белдергән тәүге ғариза буйынса енәйәт эше ҡуҙғатыуҙан баш тарталар
ҡатын апрель айында 106 мең һум аҡсаһын пирамиданың иҫәбенә күсергән була. Уға бер айҙан үҙенең аҡсаһын һәм был сумманың 40 процентын ҡайтарып бирергә вәғәҙә итәләр. Тик МММ – 2011 түләмдәре туҡтатылыу сәбәпле, ҡатын ярыҡ ялғаш янында ултырып ҡала.
«Зыян күреүсе пирамиданың бер ҡатнашыусыһы менән таныша, был ханым уға тик яңы иғәнәселәр индергән аҡса иҫәбенә генә килем алыу мөмкинлеген аңлата. МММ – 2011 эшмәкәрлеге туҡтаһа, аҡсаның юҡҡа сығыу ихтималлығы хаҡында ла һөйләй. Ғариза биреүсе ризалаша һәм үҙ теләге менән распискаһыҙ-ниһеҙ аҡсаһын сығарып тоттора. Бында бер ниндәй ҙә енәйәт составы юҡ», – ти Удмуртия полицияһы.
Сергей Мавроди – 90-сы йылдарҙа бик ҙур финанс пирамидаһын төҙөүсе һәм МММ – 2011 проектын башлап ебәреүсе. Ул май аҙағында яңы МММ – 2012 проекты эшләй башлауы, МММ – 2011 түләмдәре туҡтатылыуы хаҡында хәбәр иткәйне. Яңы проект, йәнәһе, иғәнә индереүселәргә бурыс-түләмдәрҙе түләргә ярҙам итәсәк. Ә 16 июлдә Сергей Пантелеевич, МММ – 2011 проектын тергеҙеү мөмкин түгел, унда ҡатнашыусыларға аҡсаларын кире ҡайтарып булмаясаҡ, тип белдерҙе. Рәсәйҙең монополияға ҡаршы хеҙмәте МММ – 2011 проекты схемаһын, аҡсаны нисек индереүгә ҡарамаҫтан, барыбер финанс пирамидаһы тип таныны. Ләкин халыҡ, аңра һарыҡ шикелле, йөҙәр меңләгән һум аҡсаһын шунда тыҡты һәм тағы алданды. Мавродиҙың әлегәсә миллионлаған кешене бөлгөнлөккә төшөргәне өсөн төрмәлә лә ултырып сығыуы барыһына ла билдәле ине. «Бер көн дә бил бөгөп эшләмә, беҙгә ҡушыл һәм аҡсаны тоҡлап ал», – тип реклама яһаған Мавродиҙың сайтында 35 миллион кеше теркәлгән.
Ахыры, рәсәйҙәрҙе тиҙ байыу хыялы шул тиклем аҡылынан яҙҙыра. Хатта улар илдәге иң мут, күрәләтә алдаған әҙәмгә йәне-тәне менән ышанырға әҙер.
Һуңғы көндәрҙә аферистың Һиндостанда МММ филиалын асыу менән шөғөлләнеүе мәғлүм булды. Иҫ-аҡылың китер...
Л. ҒӘЛИМЙӘНОВА.