13.01.2012 Бюджет тармағында хоҡуҡ боҙоуҙар буйынса рекорд ҡуйылған
Үткән йылда Рәсәйҙең бюджет тармағында хоҡуҡ боҙоуҙар суммаһы 718,5 миллиард һумға еткән. Иҫәп палатаһы етәксеһе Сергей Степашиндың РФ Дәүләт Думаһына ебәргән отчеты ошо хаҡта һөйләй.
Документтан күренеүенсә, аҡсаны маҡсатһыҙ тотоноу йылдан-йыл арта. Әгәр ҙә 2008 йылда бюджеттың 96,6 миллиард һумын еткермәй һанаһалар, унан һуңғы йылда был күрһәткес 238 миллиард һумға уҡ еткән, 2010 йылда, ике тапҡырға артып, 484 миллиард һум тәшкил иткән.
Былтырғы хоҡуҡ боҙоу осраҡтарының яртыһы тиерлек (356,3 миллиард һум) Бюджет кодексын үтәмәүгә бәйле. Тағы дәүләт заказы тирәләй артыҡ тотонолған аҡса арыу ғына − 238,5 миллиард һум, бюджет средстволарын маҡсаттан тыш ҡулланыу суммаһы − 1,2 миллиард һум.
Иҫәп палатаһы Сочиҙа үтәсәк Олимпия уйындарына әҙерлек йәһәтенән байтаҡ тотҡарлыҡты асыҡлаған. Күҙалланған 92 объекттың 68-е генә сафҡа индерелгән, тағы ла 20-һенең биләмәне планлаштырыу буйынса документацияһы ла әҙер түгел.
Мәғлүмәт технологиялары өлкәһендә лә етди хоҡуҡ боҙоуҙар бар. «Электрон Рәсәй» федераль маҡсатлы программаһы бойомға ашырылмай тиерлек. Был, 1,4 миллиард һум юғала, тигән һүҙ.
Бынан тыш, таможня тарафынан конфискацияланған мөлкәттең ҡайҙа булғаны аңлашылмай. Аудиторҙар һанап сығарыуынса, бюджет һуңғы өс йылда «конфискат»ты һатыуҙан уның ысын хаҡының бары тик 5,5 процентын ғына ҡайтара алған.
Оборона министрлығында ла хәлдәр шәптән түгел. Хәрби припастар һаҡлау объекттарын төҙөүгә генә күҙалланғандан 2,3 − 3,8 тапҡырға артығыраҡ сығым киткән. Һөҙөмтәлә бюджет 2,3 миллиард һум зыян күргән. Хәрбиҙәрҙе торлаҡ менән тәьмин итеү буйынса ла проблема бар. Министрлыҡ балансында дөйөм суммаһы ете миллиард һумлыҡ 3,6 мең квадрат метр файҙаланылмаған торлаҡ иҫәпләнә, имеш.
Шул уҡ ваҡытта Иҫәп палатаһы былтыр хоҡуҡ һаҡлау органдарына 176 ғына материал ебәргән. Улар буйынса 72 енәйәт, 23 административ хоҡуҡ боҙоуҙар тураһында эш асылған.
А. ЗИННУРОВА.