27.11.2010 Буй етмәҫлек йондоҙом булып балҡы
Мөхәббәтемде үҙ ҡулдарым менән селпәрәмә килтерҙем. Их, минең балҡып һүнгән йондоҙом! ҡайҙарға китеп юғалдың һин? Кемде генә үҙеңә йәр итеп һайланың? Уны ысын йөрәктән яратаһыңмы икән? Хәйер, уныһын белеү кәрәкмәйҙер, былай ҙа янған йөрәгем, уны яратыуыңды белһә, билләһи, шартлаясаҡ.
Мин хәҙер ярҙың ситендә яңғыҙым тороп ҡалдым, ә был юлды бит үҙем һайланым. Һинең йөрәгеңә ни тиклем яра һалғанды «һантый ҡыҙ бала» саҡ аңланы. Кисә ауылдашың, дуҫың һинең турала барыһын да асып һалды. Һине бит бөтөнләй икенсе яҡтан күрҙем. Үҙеңдең күҙ нурындай итеп, телефон номерыңды икенсе ҡыҙға биргәнгә саҡлы һаҡлағанһың икән. Ә минең тормошомдағы ҙур хатанан һуң, аяҙ көндө ҡара болот ҡаплап алғандай, мөхәббәтемде лә ҡара нәфрәт ялмап алды. Ә беҙ нисек бәхетле инек. Һинең шылтыратыуыңды түҙемһеҙләнеп көтә торғайным. Бер көн шылтыратмаһаң, улай ғына ла түгел, беҙҙең һәр ваҡыттағыса һөйләшә торған сәғәттә шылтыратмаһаң, һыҡтауҙар, һин тип төндәрен керпек тә ҡаҡмауҙар, әллә ниндәй хыялдар илендә гиҙеүҙәр...
Ниңә мин быларҙың барыһы тураһында ла яҙам һуң әле? Бәлки, күңел талабы менәндер. Күңелемде бушатҡандан һуң был бәхетһеҙ мөхәббәткә нөктә ҡуйырмын, тип ышанам. Әммә ысынлап яратҡан кешеңде онотоп буламы икән һуң?
Ярай, ул буйым етмәҫтәй йондоҙом булып балҡып торһон, миңә илһам, дәрт, ҡеүәт биреп йәшәтһен.
Уның менән бергә була алмаһаң да, һөйгәнеңде был тормошта бер миҙгелгә генә осратып, уның бер тапҡыр булһа ла күкрәгенә ҡыҫып ҡосаҡлағанын оноторлоҡмо һуң?
Мин бәхетле, сөнки барыһына ла тәтемәгән яратҡан кешемде, ысын мөхәббәтемде таптым. Ә юғалтыуым инде йәшлек йүләрлеге, яҙмыш һынауылыр...
Алһыу МӨХӘМӘТҡОЛОВА.