16.01.2015 “Уралым” гәзитенә – аҡ юл
Силәбе өлкәһендә йәшәүсе аҫабалар – милләттәштәребеҙҙең шатлығын уртаҡлашабыҙ: бер ни тиклем ваҡыт туҡтап торғандан һуң унда “Уралым” гәзите тергеҙелде. Хәҙер баҫма ике телдә – башҡортса һәм русса баҫылып, 8000 данала бушлай таратыласаҡ.
Гәзит Силәбе өлкәһе башҡорттары ҡоролтайы башҡарма комитеты һәм Башҡортостандың Силәбеләге даими вәкиллеге башланғысы менән булдырылды. Ул башҡорттар күпләп йәшәгән Арғаяш, Ҡоншаҡ, Сосновка, Сыбаркүл райондарында, Силәбе, Магнитогорск, Златоуст ҡалаларында таратыла.
Тәүге һанда халыҡты Силәбе өлкәһе губернаторы Борис Дубровский ҙа сәләмләгән. Редакция һәм ижади төркөм күҙаллауынса, яңылыҡтарҙан тыш, өлкә башҡорттарының көнүҙәк проблемалары, ҡыҙыҡлы факттар яҡтыртыласаҡ. “Әҙәби бит”, “Рухи тормош”, “Тарихтың тере шаһиттары” кеүек рубрикалар уйланған, башҡорт милли аш-һыуы рецептары биреләсәк.
Силәбе өлкәһе башҡорттары ҡоролтайы башҡарма комитеты рәйесе Морис Йосопов бындай гәзитте тергеҙеү көн талабы булыуын билдәләй. Халыҡты берләштереүҙең дә бер сараһы бит ул баҫма.
Милләттәштәр “Уралым”а битараф ҡалмаҫ, уҡыр, әүҙем яҙышыр, тигән өмөттә ҡалабыҙ.
А. ЗИННУРОВА.