30.08.2013 “Бөкө”һөҙ донъя йәмһеҙ

Күптәргә оҡшамаһа ла, яратам “бөкө”ләрҙе! Шешәнекен түгел инде, урамдыҡын. Эстән генә, “бөкө”ләр йышыраҡ, күберәк булһын инде, тип теләйем. Былай юрағаным юш килеп тора, улар кәмемәй, арта ғына. Һуңғы йылдарҙа ҡалабыҙ урамдарында ҡар яуһа, аҙ ғына буран сыҡһа – “бөкө”һөҙ бер тыҡырыҡ та ҡалмай хатта. Хоҙайҙың ҡөҙрәте, кем ҡасан, ҡайҙа “бөкө”гә эләгерен, унан ҡасан, нисек сығырын белмәй. Мин генә түгел, башҡалар ҙа быны үҙ файҙаһына ҡайырып алды хәҙер – “бөкө” булһа ла, булмаһа ла эшкә бер-ике сәғәткә һуңлап барам. Хас үҙебеҙҙең хужа кеүек. Ул инеп бара, артынан ҡаса-боҫа мин киләм. Тәүҙә күреп ҡалып, нишләп һуңлап йөрөйһөң, тип һораһа, бөкөлә булдым, тип ауыҙын “бөкө” менән томалағандай ҡаплай ҙа ҡуя инем. Үҙе лә “бөкө”ләрҙе яратҡанға күрәме, һуңғы ваҡытта бигүк һорап ыҙаламай.
Эштә лә “бөкө” темаһын ғына сәйнәйбеҙ – күпме һөйләһәң дә бөтмәҫ кеүек. Ҡайҙа булдың – “бөкө”лә торҙом тигән яуап хәҙер ҡайҙа булдың – ауырыным тигәнде рейтинг буйынса ҡыҫырыҡлап бара.
Бына тағы ултырам әле “бөкө”лә – юл үтерлек түгел. Бер-береһенә юл бирмәҫкә тырышып килгәндәр, ахыры, ике машина ултыра төкөлөп, барыһына ла юлды ҡаплап. Водителдәр ни эшләһен, кемдер телефондан видеоға төшөрә, кемдер сығып тәмәке тартып тора. Эшкә шылтыратып әйтеп ҡуйҙым былай, барғас, шеф алдында аҡланып тормам, исмаһам. Ана, радионан, прос­пектта ла бер нисә урында ҙур бөкөләр бар тип әйттеләр. Булһын, әйҙә. Рәхәт бит, бушҡа көн уҙа ғына…
Кемгә – нисек, әммә мин “бөкө”ләрҙе һәр саҡ тыуҙырып тороусы коммуналь хеҙмәттәргә, юлда күҙенә аҡ-ҡара күренмәй бәрелешкән водителдәргә, кисә генә “право” алып, иномарка һатып алған һәм рулен дә бора алмай ултырған “сәй­нүк”тәргә сикһеҙ рәхмәтлемен. Яратам, обожаю “бөкө”ләрҙе!

Л. Ташбулатова.