02.04.2013 “Уҙған ғына ғүмер, ҡалған хәтер”
Башҡортостандың халыҡ шағиры Рауил Бикбаевтың “Көндәлектәр” китабы донъя күрҙе. Йыйынтыҡ ике ҡалын томдан тора. Тәүгеһендә 1968 − 1999 йылдарҙа алып барылған көндәлектәр тупланған. Икенсе томға 2000 − 2009 йылдарҙағы яҙмалар ингән. “Көндәлектәр” Өфө полиграфия комбинатында әҙиптең үҙ иҫәбенә нәшер ителгән.
“Мин күптән инде көндәлектәр яҙам. ҡырҡ йылдан ашыу ваҡыт эсендә күргәндәрем-кисергәндәрем теркәлеп барған дәфтәрҙәрем хәҙер бер нисә китап булырлыҡ. Тормош сәхифәләре тәүге осорҙа онотҡанда бер тигәндәй ҡағыҙ битенә төшһә, ғүмер үткән һайын, уларға йышыраҡ иғтибар иттем. Көндәлектәр асылда ижадымдың үҙенсә бер мөһим өлөшөнә әйләнде. Шиғри ижадымда, мәҡәләләремдә, ғилми хеҙмәттәремдә, сығыштарымда әйтеп йәки яҙып өлгөрмәгән һүҙҙәремде мин бына ошо дәфтәрҙәремә яҙып барҙым. Уларҙа төрлө ваҡиғалар уртаһында яҙмышыма уйылған уйланыуҙарым, мине һоҡландырған матурлыҡтар, инандырған изгелектәр, табындырған тоғролоҡтар, һыҙландырған ғәҙелһеҙлектәр, яралаған хыянаттар үҙҙәренең эҙен ҡалдырған. Был көндәлектәрҙә − минең яҙмышым, минең ваҡытым, минең донъям. Ләкин улар замандаштарымдың күргәндәренән айырылғыһыҙ”, − тип яҙа йыйынтыҡтың баш һүҙендә Рауил Бикбаев.
Китап әҙиптең ижадын һөйөүселәр, киң ҡатлам уҡыусылар өсөн дә мауыҡтырғыс һәм ҡыҙыҡлы булыр, “Көндәлектәр”ҙе ҡулына алыусылар Рауил Бикбаевтың ижады, эшмәкәрлеге менән тәрәнерәк танышыр, уны яңыса асыр һәм ауаздаш, уртаҡ тойғоларға, уйланыуҙарға тап булыр.
Мөнир ИҡСАНОВ.
Оҡшаш яңылыҡтар
