24.05.2011 Бер осрашыу – үҙе бер ғүмер

Яңыраҡ Ағиҙел һәм Нефтекама ҡалаларында Милләт-ара татыулыҡты нығытыу йылына арналған Башҡорт балалар әҙәбиәте көндәре үтте. Унда Башҡортостан Яҙыусылар союзы идараһының баш әҙәби консультанты, Башҡортостандың атҡаҙан­ған мәҙәниәт хеҙмәткәре, шағирә Фәрзәнә Ғөбәйҙуллина, Һ. Дәү­ләтшина исемендәге дәүләт, М. Аҡмулла исемендәге әҙәби премиялар лауреаттары – шағирә Гөлфиә Юнысова һәм яҙыусы Факил Мыр­ҙаҡаев, Н. Нәжми исемендәге әҙәби премия лауреаты – яҙыусы Илдус Тимерханов, шағирә, тәржемәсе Рәшиҙә Бик ҡатнашты.
Әҙиптәр Ағиҙелдә баш­ҡорт гимназияһында, 1-се һәм 2-се мәктәптәрҙә, үҙәк китапханала, сәнғәт мәктәбендә, Нефтекама ҡалаһында баш­ҡорт гимназия-интернатында, 2-се һәм 13-сө мәктәптәрҙә, балалар һәм үҫмер­ҙәр ижадын үҫтереү үҙәгендә уҡыу­сылар, уҡытыусылар, китапханасылар, ата-әсәләр менән осрашты. Өфө ҡунаҡтары үҙ ижады менән таныштыр­ҙы, китаптарын бү­ләк итте, автографтар бирҙе. Уҡыу­сылар ҙа сәхнәгә күтәрелде: шиғыр һөйләнеләр, йырланылар, бейенеләр, әкиәт-хикәйәләрҙе сәхнәләштереп күрһәттеләр. Уларҙың һорауҙары ла яуап­һыҙ ҡалманы.
Нефтекаманың 2-се урта дөйөм белем биреү мәктәбендә иһә әҙиптәр менән бер рәттән, 5-се һәм 8-се синыф уҡыусылары Анас­тасия Та­бишева, Айһылыу Яруллина үҙҙәре яҙған шиғырҙар­ҙы һөйләне. Яҙыу­сылар шиғриәттә ҡә­лә­мен һынап ҡараусыларҙы Бәләбәй ҡалаһында ойошторол­ған «Илһам шишмәләре» фестивалендә ҡатнашырға саҡырҙы. «Әҫәр­ҙәрегеҙҙе балалар һәм үҫмер­ҙәр өсөн сығарылған гәзит-журналдарға ла ебәрә алаһығыҙ», – тине улар.
Һәр кисә-осрашыуҙа шундай фекер яңғыраны: балалар әҙәбиәте көндәрен даими үткәрергә кәрәк, сөнки яҙыу­сылар менән аралашыу үҫмер­ҙәргә тормошто аңлар­ға, йәмғиәттә үҙ урыныңды табырға ярҙам итә.

Ф. СӘЛИХОВ.