16.04.2013 Мөхәббәткә мәҙхиә йырланасаҡ
Башҡортостандың халыҡ артисы, билдәле йырсы Әлфиә Юлсурина дәртле йырҙары, сағыу сығыштары менән тамашасыны әсир итте. Танылған сәхнә оҫтаһы башҡарған йырҙар тормошҡа һөйөү, мөхәббәткә дан менән һуғарылған һәм тәрән мәғәнәгә эйә. Йырсының репертуары жанр яғынан шаҡтай бай. Халыҡ йырҙары, заманса эстрада йырҙары − барыһы ла урын алған унда. Әлфиә Юлсурина Башҡорт дәүләт филармонияһында эстрада-джаз оркестры составында эшләй. Әйткәндәй, Әлфиә Юлсурина 21 апрелдә күңелдәрҙе елкендерер, хистәр даръяһында тирбәлтер “Аҙаштырғыс мөхәббәт” исемле концертына саҡыра. Сағыу тамашала Салауат Низаметдинов, Азат Айытҡолов, Ғәли Алтынбаев, Хәлит Фәтихов, Азат Биксурин, Айнур Фәтихов, Рөстәм Шаһыбалов, Марсель Ҡотоев, Руслан Сәйфетдинов, Марсель Сәйетов, Айгиз Ғиззәтуллин, Вадим Зәкиев, Игорь Атапин, Башҡортостан Республикаһының Рәмил Ғәйзуллин етәкселегендәге халыҡ ҡоралдары милли оркестры, Олег Ҡасимов етәкселегендәге эстрада-джаз оркестры сығыш яһаясаҡ. Күңелле, дәртле йырҙар шәлкеменән торған тамашаға рәхим итегеҙ, дуҫтар!
Н. АҘНАБАЕВА.