18.04.2017 "Иләү"

“Юлдаш” радиоһында аҙнаһына биш тапҡыр эфирға сыҡҡан “Иләү” – балаларҙың күп һорауына яуап биреүсе, донъяны танып-белергә өйрәтеүсе тапшырыу, үҙенә күрә бер энциклопедия ул. Алынған теманы асып ҡына ҡалмай, хатта әкиәт, шиғыр­ҙар менән дә нығытып, баланың хәтеренә һалып ҡуя. Шулай уҡ әкиәттәр, шиғырҙар һөйләргә, йырларға оҫта балалар була. Уларҙы саҡырып, “Тәтелдәйҙәр “Иләү”е тигән махсус тапшырыуҙар ҙа яҙҙырабыҙ. Ата-әсәләр бик теләп алып килә тәтелдәктәрен.
Тапшырыуға килгән балалар ҡайһы ваҡыт ҡыҙыҡ ҡына хәбәр­ҙәр һөйләп йә көлдөрә, йә аптырата. Мин шуларҙы яҙып барам һәм ҡайһы берҙәрен гәзит уҡыу­сыларға тәҡдим итәм. Мәҫәлән, 6 йәшлек Рамазан Ишкинин исемле малайҙы, тапшырыуҙы яҙҙырғандан һуң, балалар баҡсаһына алып китеп барам. Тышта һалҡынайтып ебәргән. Мин: “Уф, һыуытып ебәргән икән”, – тинем. Ул миңә: “Дөмбөрләтеп ямғыр яуырға уйлай”, – тип яуап бирҙе. Ә 3 йәшлек Сулпан Ғәлиуллина исем­ле ҡыҙыҡай: “Беҙгә малай сестренка кәрәк”, – тине. 5 йәшлек Наҙгөл Шәрәфетдинова сәтләүектәр тураһында “Иләү”гә яҙылды. Аҙаҡ үҙенән, тыңланыңмы радионан, тип һорағас: “Бөтәһе лә тыңланы: өләсәйемдәр, Айнур ағайым телефонға яҙҙырҙы, бөтәһе лә көлдөләр. Һәйбәт булды”, – тип һығымта яһап ҡуйҙы.
4 йәшлек Айзель Әҙелбаева һөйләй: “Миңә (дүрт бармағын күрһәтә) йәш, Йософҡа (ике бармағын күрһәтә) йәш, ә Ибра­һимға бер нисә йәш тә түгел. Ул яңы тыуған”. Бер көндө аяғы бысранған. Аяғыңды кем бысратты, тип һорағас, үҙем түгел, туфлийым бысратты, тине.
Айзель әсәһе менән “Сәңгел­дәк” тапшырыуына төшөргә кил­де. Әсәһе – Лилиә Дауытова тапшырыуҙа алып барыусы булып төшә. Үҙҙәре менән 4 айлыҡ Ибраһимды ла алып килгәндәр. Балаларын “Тамыр”ҙа ҡалдырып, Лилиә үҙе гримға барырға йы­йынды: “Айзель ҡыҙым, бәпес­те ҡара”, – тине. Лилиә гримға китте, Ибраһим тыныс ҡына коляскала ята. Ниндәйҙер йомош артынан Айзель менән кабинеттан сығырға кәрәк ине. Айзель алдан сыҡты ла: “Бәпесте ҡара!” – тип ишекте шап итеп минең танау төбөндә генә ябып ҡуйҙы. Шулай итеп, мин бүлмәлә бәпес ҡараусы булып ҡалдым.
Йософ Әҙелбаев (3 йәш) әсәһе менән магазинға барып килде лә: “Әҫәйем ҫикалат алды. Кем эҫләмәй, ҫул аҫамай!” – тип һөрән һалды.
Бәләкәй ҡыҙҙарҙың һәм малай­ҙарҙың һөйләшеүен тыңлап, уларҙың күп нәмәне ябай һәм тапҡыр тел менән шул тиклем дөрөҫ аңлата алыуына йыш ҡына хайран ҡалам. Балаларҙың күңел күҙе үткер булалыр, күрәһең.

Зөлфиә ДАЯНОВА.