28.02.2014 Ә беҙҙең ауылда...
Был аҙнала үҙҙәрен ҡыуандырған яңылыҡтар, изге теләктәре менән Белорет, Йылайыр, Хәйбулла райондарында йәшәүселәр уртаҡлашты.
Ә һеҙҙең ауылда ниндәй хәлдәр, башҡаларға ла еткерерҙәй ваҡиғалар бар? Дежур телефонға (89659232000) шылтыратып, хәбәр итегеҙ.
Әлфиә БАҺАУЕТДИНОВА, Белорет районының Йөйәк ауыл хакимиәте белгесе:
– Һыуыҡтарға бирешмәй, ҡышты матур ғына үткәреп киләбеҙ. Әле кешеләр малына бесән ташый. Ауылда төрлө саралар ҙа ойошторолоп тора. Әле генә Ватанды һаҡлаусылар көнөнә ҡарата мәктәптә “Йәгеҙ әле, егеттәр!” ярышы үтте, һуңынан клубта балалар ҡатнашлығында матур тамаша булды. Беҙҙең ауылдан һигеҙ кеше афған һуғышында ҡатнашҡан, 19 кеше Чечняла хеҙмәт иткән. Уларҙың барыһын да байрам менән ҡотланыҡ.
Эшебеҙҙә иһә күп балалы ғаиләләргә ер бүлеү мәсьәләһе менән шөғөлләнәбеҙ, документтар әҙерләйбеҙ, ғаризалар ҡабул итәбеҙ, мөрәжәғәт итеүселәргә ниндәй документтар йыйырға кәрәклеген аңлатабыҙ.
Әлиә СӨЛӘЙМӘНОВА, Йылайыр районының Ҡашҡар ауыл биләмәһе хакимиәтенең эштәр идарасыһы:
– Беҙҙең Ҡашҡар ауыл советына Ҡашҡар, Исҡужа, Мәҡсүт, Ишбулды ауылдары ҡарай. Ауылдарҙа төрлө саралар ойоштороп, матур ғына йәшәп ятабыҙ. Үткән аҙнала ауыл клубында район хакимиәте башлығы Илгиз Фәтҡуллин, урман хужалығы, ер мәсьәләһе буйынса белгестәр ҡатнашлығында Хакимиәт көнө үткәрҙек. Халыҡ күп булды, зал тулы ине. Уларҙы пай ерҙәренә ҡағылышлы, йорт төҙөү хаҡындағы һорауҙар ҡыҙыҡһындырҙы. Ишле, инвалид бала тәрбиәләгән ғаиләләр бушлай ер алыу мөмкинлектәре хаҡында һорашты. Йәштәр йорт төҙөп, ауылда төпләнә, тыуым да йылдан-йыл арта бара. 2012 йылда, мәҫәлән, 19 сабый донъяға килһә, 2013 йылда 21 бала тыуҙы, быйыл иһә ауыл халҡы тағы дүрт кешегә артты.
Ошо көндәрҙә мәктәп уҡыусылары ҡартатайҙарын саҡырып, матур байрам ойошторҙо. Беҙҙең ағинәйҙәр клубы ла әүҙем эшләй. Февралдә округтар араһында ойошторолған концерт та ауылыбыҙ тормошона йәм өҫтәне. Үткән аҙнала исҡужалар концерт ҡуйғайны, быныһында Мәҡсүт менән Ишбулды ауылдарының концерты буласаҡ. Күрше райондар менән дә дуҫ йәшәйбеҙ. Февралдә Ейәнсуранан ҡунаҡтар килеп, тәжрибә уртаҡлашып ҡайтты.
Таһир Юнысов, Хәйбулла районының Әбеш ауыл хакимиәте башлығы:
– Ҡыуаныслы яңылыҡтарыбыҙ бар. Вәзәм ауылының бейеү ансамбле Баймаҡта “Байыҡ” телевизион бейеү конкурсының һайлау турына үткәйне, кисә Өфөлә конкурста ҡатнашып, 2-се турға үтеп ҡайттылар. Бынан тыш, 2013 йылда районда ауылдарҙы төҙөкләндереү, төрлө саралар ойоштороу буйынса “Йәнтөйәгем – Хәйбулла” акциялар фестивале булғайны, шунда гран-при яуланыҡ һәм бүләккә 200 мең һум аҡса алдыҡ. Был – беҙҙең өсөн ҙур еңеү ул.
Дөйөм алғанда, тормош һәүетемсә дауам итә. Ҡышты имен-аман сығып киләбеҙ. Быйыл ул бик ауыр булды тип әйтеп булмай. Мал аҙығы етерлек, юлдар бар. Башҡа йылдар менән сағыштырғанда, ҡар күп түгел, әлегә бурандар ҙа булғаны юҡ. Беҙҙең яҡта “аҡман-тоҡман” башланһа, аҙналар буйы дауам итә, юлдар ябыла, бер ҡайҙа ла сыға алмай ятабыҙ. Беҙҙең ауыл – иң төпкөлдәрҙең береһе, район үҙәгенән – 75, Өфөнән 660 саҡрым алыҫлыҡта ята. Яҙҙы көтәбеҙ. Иретә башлаһа, юл йөрөү ауырлаша, шуға борсолабыҙ.