04.10.2013 Журналистар – Сочиҙа
Әле республикабыҙҙың бер төркөм журналисы Сочи ҡалаһында ойошторолған “Бөтә Рәсәй – 2013” тип аталған Бөтә Рәсәй журналистар фестивалендә ҡатнаша. Башҡортостандың матбуғат саралары вәкилдәренән тупланған делегацияның етәксеһе – БР Журналистар союзы рәйесе Артур Дәүләтбәков. Уның составында район һәм ҡала гәзиттәренең баш мөхәррирҙәре бар.
1 октябрҙә беҙҙең делегация тотош илдән йыйылған коллегаларыбыҙ алдында үҙенең презентацияһын ойошторҙо. “Башҡортостан Республикаһының Журналистар союзы: көс – берҙәмлектә” тип исемләнгән таныштырыу барышында журналистар район-ара ижади ойошмаларының эшмәкәрлеге, союздың ветерандары һәм йәш ағзалары менән бәйләнеш тураһында һөйләне. Шулай уҡ БР Журналистар союзы ойошторған фестивалдәр һәм башҡа акциялар тураһында ла һүҙ булды. Башҡортостан журналистарының эшен күрһәткән ҡыҙыҡлы видеороликтар, гитара, думбырала уйнап йырланған йырҙар һәм, әлбиттә, сәк-сәк менән бал Бөтә Рәсәй журналистар фестиваленә килгән барса халыҡты таң ҡалдырҙы. Шуға ла барыһы ла беҙҙең журналистарҙың презентацияһын бер тауыштан иң яҡшыһы тип билдәләне.
29 сентябрҙә башланған был матур сара бөгөн тамамлана.
Л. СОЛТАНОВА.