28.05.2013 Изге йөрәк изгелек сәсә
Барыһы ла бер кешенән, бер изгелекле йөрәктән башлана. Медицина учреждениеларында йыш булып, ундағы ауыр мөхитте, стеналарға ғына түгел, ә һауаға ла һеңгән сир еҫен үҙ күңеле менән тоя Андрей Бикҡолов атлы егет. Ундай хәл-торош бит сәләмәт кешене лә хәүеф, өмөтһөҙлөк, юлһыҙлыҡ сигенә килтерә.
Кешеләргә нисек ярҙам итергә һуң? Әлеге мөхитте нисек бер аҙ булһа ла еңеләйтергә? Ниндәй юлдар менән сирлеләрҙең рухын күтәрергә? Егет алдында ошондай һорауҙар тыуа. Һәм ул… комедиялар күрһәтергә була. Был, һис шикһеҙ, кәйефте күтәрәсәк. “Шат йөрәк табиплыҡ кеүек шифа бирә, ә рух төшөнкөлөгө һөйәкте ҡорота”, – тип яҙылған бит Тәүратта ла.
Андрей Өфө ҡалаһы онкология диспансерының баш табибы менән шәмбе көндәрендә фильм күрһәтеү буйынса килешә лә, республиканың төрлө райондарынан йыйылған кешеләрҙе дауахананың бер мөйөшөнә кино ҡарарға саҡыра башлай. Тәүҙә яңғыҙы эшләй. Егеттең игелеклелеге, яҡшы ниәттәре башҡаларға ла йоғонто яһай һәм ярҙамсылары ла табыла. Тиҙҙән “Изге йөрәк”тә татыу, берҙәм команда туплана. Уларҙың тырышлығы менән ике йыл эсендә бихисап кешене шатлыҡ, мөхәббәт һәм игелек ярҙамында һауыҡтырыуға өлгәшелә. Залдар тулы концерттар ҙа ҡуйыла, был бигерәк тә Пасха, Раштыуа кеүек байрамдарҙа була. Мобиль китапхана ла туплана – китаптарҙы сумкалап-сумкалап ташыйҙар, хатта тотош йорт китапханаһын бүләк итеүселәр ҙә табыла. Үҙ өйөн, мәшәҡәттәрен бер көнгә ҡалдырып, сирлеләр араһына килеүселәргә нисек һоҡланмайһың?! Бер йылы һүҙ көс тә, өмөт тә, ышаныс та бирә бит ул. Кеше йылмайыуҙан, ихлас ҡосаҡтан да шәбәйә!
“Изге йөрәк”тең Башҡорт дәүләт ҡурсаҡ театры менән берлектәге хәйриә проектын да атап үтеү мотлаҡ. “Урман йәрминкәһе” тип аталған сара ысын мәғәнәһендә байрам төҫө алды, йылылыҡ, иғтибар, хәстәрлек менән тулы булды.
Шахмат-шашка, домино турнирҙарын да ойошторҙо “изге йөрәк”тәр. Был сирлеләрҙе бер нисә сәғәткә ауырыуы тураһында онотторҙо, һәр кемдә ярыш сәме уянды. Кешеләр аралашыуҙан, дөйөм шатлыҡтан да энергия, көс алып, һауығыу юлына баҫты.
Бөгөн республика хәйриә ойошмаһы – “Изге йөрәк”тең эштәре күп. Ул хәҙер бер Андрей ғына түгел, ә егермеләгән волонтерҙы үҙ эсенә алған. Барыһы ла йөрәге ҡушыуы буйынса дауаханаларға еңеллек, ҡеүәт, йыуатыу алып килә.
Александр СТАРУХИН.