22.03.2013 Юлдарҙа елеп йөрөйәсәкбеҙ
БР Хөкүмәте 2030 йылға тиклем Башҡортостандың төбәк һәм муниципаль-ара кимәлдәге дөйөм ҡулланылыштағы автомобиль юлдарын камиллаштырыу һәм үҫтереү стратегияһын тикшерҙе.
Был стратегияны контракт буйынса Санкт-Петербург Территориаль үҫеш һәм транспорт инфраструктураһы ғилми-тикшеренеү һәм проектлау институты эшләй. Ул асыҡ конкурс нигеҙендә һайлап алынған.
Төбәктә юлдар мәсьәләһенең көнүҙәк булыуын барыбыҙ ҙа белә.
Республика Президенты Рөстәм Хәмитов та төбәк һәм муниципаль-ара кимәлдәге юлдарҙың – 76, урындағы юлдарҙың 80 проценттан ашыуына ремонт талап ителеүе хаҡында әйтте. Булған күперҙәрҙең яртыһы тиерлек насар хәлдә. Әлбиттә, тармаҡтың төп проблемаһы – аҡса етмәүҙә. 2006 − 2010 йылдарҙа, мәҫәлән, юл эштәрен финанслау күләме 18 процентҡа тиерлек ҡыҫҡартылған.
– Нормаға ярашлы, йыл һайын 3,5 мең километр юлға ремонт талап ителә, беҙ иһә тейешле күләмдең биштән бер өлөшөн ремонтлайбыҙ, – тип билдәләне Президент.
Был хәлде төҙәтеү өсөн оҙайлы ваҡытҡа иҫәпләнгән системалы эш талап ителә. Үрҙә телгә алынған стратегия тап шуның өсөн кәрәк тә инде.
Санкт-Петербург Территориаль үҫеш һәм транспорт инфраструктураһы ғилми-тикшеренеү һәм проектлау институты иҫәпләүҙәре буйынса, максималь вариант буйынса дөйөм сығым – 612,2 миллиард һум, минималь буйынса 249,7 миллиард һум тәшкил итә. Сумманың иң күп сығымдан 279 миллиард һумын һәм әҙ сығымдан иҫәпләнгән 113 миллиард һумын тик юлдар төҙөүгә һәм реконструкциялауға йүнәлтеү күҙаллана. Беренсе вариант − 2626 километр, икенсеһе 1800 километр юл төҙөүҙе, реконструкциялауҙы күҙ уңында тота. Йәнә лә теүәлерәк һанға туҡталғанда, стратегияның максималь варианты буйынса юлдың бер километры – 110 миллион һумға, минималь буйынса 63 миллион һумға төшәсәк.
Стратегия Европа – Көнбайыш ҡытай халыҡ-ара транспорт коридоры составына ингән Баулы − Күмертау юлын төҙөүҙе лә үҙ эсенә ала.
Башҡортостан Президенты фекеренсә, Европа – Көнбайыш ҡытай коридорының әлеге участкаһы Башҡортостан сиге буйлап ҡына үтәсәк һәм ҙур сәнәғәт үҙәктәрен үҙ-ара бәйләмәйәсәк. Шуға күрә әлеге түләүле юлдың беҙгә файҙа килтереүе икеле.
Ултырышта билдәләүҙәренсә, документты аҙағынаса эшләп еткерергә кәрәк. Бер ай эсендә ул йәнә министрлыҡ һәм ведомстволарҙа ҡараласаҡ, бынан һуң республика Хөкүмәтендә ҡабат тикшереләсәк.