19.10.2012 Ағас та иҫәп ярата
Өфөлә ағас материалдарын иҫәпкә алыуға арналған конференция үтте.
Форумдың төп маҡсаты – рөхсәтһеҙ ҡырҡылған ағас әйләнеше мәсьәләһен тикшереү. Йәмғиәтебеҙҙә бындай процестарҙың цивилизациялы, законлы булыуы мөһим, ағас эшкәртеүгә бәйле барлыҡ процестарҙы күҙәтеп барыу шарт.
Әлеге конференция барышында Башҡортостан Президенты Рөстәм Хәмитов Федераль урман хужалығы агентлығы етәксеһе Виктор Масляков менән дә осрашты.
Виктор Масляков билдәләүенсә, бөгөн федераль кимәлдә ағасты иҫәпкә алыу системаһын мәғлүмәтләштереү мәсьәләһе тикшерелә.
Субъекттарҙа махсус серверҙар булдырыласаҡ, уларҙа ағас буйынса барлыҡ мәғлүмәт тупланасаҡ. Башҡортостанда федераль структуралар араһындағы бәйләнештәр яйға һалынған. Система яҡшы эшләһен өсөн, иҫәпкә алыуҙан тыш, процессуаль мәсьәләләр ҙә мөһим. Республикала был система тәүге этабында яҡшы үҙләштерелгән. Агентлыҡ етәксеһе тап ошо эш менән ҡыҙыҡһынып, уны илгә таратыу ниәтен белдерҙе.
Бөгөн илдең урман комплексында урман хужалығын, ағас әҙерләү һәм эшкәртеү буйынса урман сәнәғәте предприятиеларын үҙ эсенә алған ағас материалдарҙы иҫәпкә алыу системаһы юҡ. Был дәүләт һәм бизнес өсөн кире һөҙөмтәләргә килтерә.
Рөстәм Хәмитов фекеренсә, урман комплексының мөмкинлектәре әлеге ваҡытта тулы кимәлендә файҙаланылмай. Ошо хәлде үҙгәртер өсөн производствоны яңыртыу, тәбиғәт ресурстарын теүәл файҙаланыу, шул иҫәптән ағасты тәрән эшкәртеү талап ителә.
Башҡортостан Президенты белдереүенсә, үҙебеҙгә ағас эшкәртеү өлкәһен үҫтерергә, эшкәртеүсе ҙур производстволар барлыҡҡа килһен өсөн шарттар булдырырға кәрәк.
Рөстәм Хәмитов ошо көндәрҙә “Kronospan Holdings East Ltd” компаниялар төркөмө башлығы Питер Кайндл менән ағас эшкәртеү һәм төҙөлөш материалдарын етештереү буйынса республикала ҙур предприятие төҙөү тураһындағы килешеүгә ҡул ҡуйғайны.
Предприятие Өфө районында урынлашасаҡ һәм 2014 йылда продукция етештерә башлаясаҡ. Проекттың дөйөм хаҡы яҡынса 15 миллиард һум тәшкил итә.
Әйткәндәй
Урман хужалығы федераль агентлығы мәғлүмәттәре буйынса, 2011 йылда ил кимәлендә закон боҙоп әҙерләнгән 1,3 миллион кубометр ағас әйләнешкә ебәрелгән. Был Рәсәйҙә легаль булмаған ағас бизнесы үҫешә тигәнде аңлата түгелме?