06.12.2011 ИШЕМБАЙ ДАНЫН КҮТӘРЕҮСЕ БАТЫР ЕГЕТЕ
Бәрәкәтле Юрматы ере борон-борондан таланттарға бай булды. Күптән түгел, көҙ башында, ишембайҙар үҙҙәренең мәшһүр улы, Башҡортостандың халыҡ яҙыусыһы, Салауат Юлаев исемендәге дәүләт премияһы лауреаты, билдәле әҙип Ноғман ағай Мусиндың күркәм юбилейын билдәләгәйне. Еребеҙгә һалҡын ҡыш аяҡ баҫҡанда, Ишембай ҡалаһының мәҙәниәт һарайында Юрматы еренең тағы бер арҙаҡлы улы, үҙенең хеҙмәттәрендә – ваҡытлы матбуғат өсөн яҙылған мәҡәләләр, балаларға арналған хикәйәләр йәки повестар булһынмы, оло йәштәге замандаштарыбыҙҙың рухи ихтыяжын ҡәнәғәтләндереү өсөн ижад ителгән драма әҫәрҙәреме – ошо изге еребеҙҙең матурлығын, уның уңған улдарын һәм ҡыҙҙарын данлаған яҙыусы Мөҙәрис Багаевтың 60 йәшлек юбилейы билдәләнде. Ул Федоровка районының Батыр ауылында тыуһа ла, Ишембайҙа күптән үҙ кеше.
Юбилярҙы тәбрикләргә Башҡортостан Яҙыусылар союзынан билдәле әҙип Рәшит Низамов, “Башҡортостан” гәзитенең баш мөхәррире Ниязбай Сәлимов, “Урал” башҡорт халыҡ үҙәге рәйесе, Юрматы ырыуы башҡорттарының ҡор башы Риф Иҫәнов һәм башҡалар килгәйне.
Юбиляр хаҡында Ишембай районы хакимиәтенең эштәр идарасыһы Рәмил Абдуллин да бик матур йылы һүҙҙәр әйтте. Ул Мөҙәрис Багаевтың, проблемаларҙы ҡыйыу яҡтыртыусы, үткер ҡәләмле журналист, тормошсанлығы, халыҡсанлығы менән уҡыусылар күңелен яулап алған әҙип булыуы менән бергә, крәҫтиән-фермер хужалығы етәксеһе икәнлеген дә һыҙыҡ өҫтөнә алды.
Мөҙәрис Басир улын был көндө “Йәшлек” гәзите коллективы ла ихлас ҡотланы. Уға БР Журналистар союзының Почет грамотаһы тапшырылды.
Мөҙәрис Багаевҡа күңелдәренән сыҡҡан һүҙҙәрен еткерергә Салауат башҡорт дәүләт драма театры артистары ла килгәйне. Улар юбилярҙың әҫәре буйынса сәхнәләштерелгән спектаклдән өҙөк күрһәтеп, байрам сараһын тағы ла йәнләндереп ебәрҙе.
Кисәгә шулай уҡ Башҡортостандың халыҡ артисткаһы Гөлсәсәк Шәрипова, Башҡортостандың атҡаҙанған мәҙәниәт хеҙмәткәре Мәүлиҙә Закирова, “Сулпылар” телевизион бәйгеһе лауреаты Нурия Ғәлләметдинова, Зөмәрә Ғиләзетдиноваларҙың иҫ киткес матур йырҙары, “Берғамыт” муниципаль бейеү ансамбленең дәртле бейеүҙәре йәм өҫтәне.
Билдәле журналист Сибәғәт Рахманғоловтың кисәне уйын-көлкө менән ҡатнаштырып алып барыуы ла кәйефте күтәрҙе.
Тимер ҒӘЛИЕВ.
Ишембай ҡалаһы.
Наил РӘЖӘПОВ фотоһы.