17.09.2011 «Таҙа күл»дән – таҙа күңелгә
ҡоншаҡ районында йәшәүсе башҡорт йәштәре берләшеп, Айҙыкүлде туристар ҡалдырған бысраҡтан таҙартты
Силәбе өлкәһенең ҡоншаҡ районы – күлдәр иле. Унда илленән ашыу күл иҫәпләнә. Иң ҙурҙарының береһе – Айҙыкүл (ун һигеҙенсе быуатҡа ҡараған тарихи сығанаҡтарҙа ул Әйлекүл тип атала). Һыу ятҡылығының ярҙары батҡыл булыуға ҡарамаҫтан, бында ял итергә теләүселәр күп йыйыла. Тик рәхәтләнеп күңел асҡан ҡырағай туристар үҙҙәренән һуң тау-тау сүп-сар ҡалдыра, бик һирәктәр генә үҙе артынан ял урынын йыйыштырып ҡуя.
Бысраҡлыҡҡа батҡан тәбиғәт ҡомартҡыһының аяныс хәле менән ризалашмаған ҡоншаҡ районының башҡорт йәштәре иттифағы август айында «Таҙа күл» акцияһын ойошторҙо. Бер нисә сәғәт әүҙем генә эшләп алғандан һуң улар ике йөҙ тоҡ сүп-сар йыя! Емеш-еләк, йәшелсә булһа, был «уңыш»ҡа һикереп төшөп ҡыуанырҙар ине, ләкин тоҡтар, үкенескә күрә, ял итеүселәрҙең һаман да ҡулланыусылар принцибы менән йәшәүе күрһәткесе генә шул.
– Тәбиғәттән бар нәмәне лә алабыҙ, ә алмашҡа уға нимә тәҡдим итәбеҙ? Әлеге лә баяғы битарафлыҡты, – тип әсенеүен белдерҙе иттифаҡ рәйесе Уйылдан Ғайсин. – Шөкөр, йәштәребеҙ күлдең тирә-яғын таҙартыу идеяһын бер һүҙһеҙ күтәреп алды. Аҙаҡ ауыл халҡы ла пляжды таҙартырға ҡушылып китте. Эште тамамлағас, Фәнис Солтанғоловтың, «Етегән» төркөмөнөң концертын ҡараныҡ.
Иттифаҡ районда яңы ғына ойошторолоуға ҡарамаҫтан, үҙен ошондай матур саралар менән танытып өлгөрҙө. Тыуған еребеҙгә, туған телебеҙгә битараф булмаған йәштәр берләшеп, өҫтән күрһәтмәләр көтөп ятмай, донъяны, йәмғиәтте яҡшыртыуға үҙ өлөшөн индерә. Күптәр Силәбе ҡалаһында уҡый, эшләй, шулай ҙа тыуған төбәк менән бәйләнеште өҙмәй, сараларҙа ҡатнашырға теләк тә, форсат та таба. Мәҫәлән, әлеге ваҡытта улар аҙ тәьмин ителгән ғаиләләргә ярҙам итеү ниәте менән янып йөрөй. Башҡаларҙы ҡыуандырған ҡыҙҙар һәм егеттәр үҙҙәренең тормошона ла шатлыҡ осҡондарын ҡундыра – быны улар үҙҙәре лә яҡшы аңлай.
Баныу ҡАҺАРМАНОВА.