02.04.2013 РӘМИ МИНЕКЕ ЛӘ, БЕҘҘЕКЕ ЛӘ!
“Шоңҡар” йәштәр журналының интернет селтәрендә "Минең Рәми!" шиғыр ятлау конкурсын үткәреүе изге бер йолаға әйләнеп бара
Видеоформатта барған шиғри ярыш ысын мәғәнәһендә халҡыбыҙҙың бөйөк улы, халыҡ шағиры Рәми Ғариповтың ижадына ҡарата күңелендә ысын һөйөү менән янғандарҙы бер урынға тупланы. Был бәйгенең киң таралыш табыуы, әлбиттә, уҡытыусыларға бәйле. Милләт, туған телгә һөйөү тигән мөһим төшөнсәләр балаға, тәү сиратта, ғаиләлә һалынырға тейеш булһа, икенсе урында белем дә, мәҙәниәт усағы ла булған мәктәптер ул. Тап уҡытыусыһы, был осраҡта башҡорт теле һәм әҙәбиәте уҡытыусыһы, тәрбиәсеһе аша ул халҡыбыҙ ижадының, әҙәбиәтенең ынйыларын, таждарын йыя.
Ике йөҙҙән ашыу видеояҙма ҡатнашты конкурста. Географияһы быйыл да киң булды уның: Баймаҡ, Бөрйән, Учалы, Белорет, Салауат, Ишембай, Хәйбулла, Ғафури, Туймазы, Әлшәй, Ейәнсура һәм башҡа райондарҙан уҡыусылар ихласлап ҡатнашты. Мәскәү, Санкт-Петербург ҡалаларында уҡып йөрөүсе йәштәребеҙ ҙә ситтә ҡалманы. Усман Юнысов, Иҙел Бохарбаевтарҙың Рәми Ғариповтың шиғырҙарын Мәскәү Кремле янында шартлатып ятлап тороуын күреү – үҙе бер ҙур ҡыуаныс! Ауылдарыбыҙҙа эшләүсе уҡытыусыларыбыҙ ҙа әүҙем. Уларҙың ҡатнашыуы тәү сиратта – уҡыусыларға миҫал, яҡшы өлгө. Мәҫәлән, Бөрйән районының Яуымбай мәктәбе уҡытыусыһы Зилә Хәкимйән ҡыҙы Хәйбуллинаның шағирыбыҙҙың "Табыныу" поэмаһын яттан һөйләүе тик маҡтауға ғына лайыҡ. Бәйгенең башҡорт балаларын бергә туплауы хаҡ, ә шулай ҙа тиҫтерҙәренән ҡалышмай, рус балаларының да шартлатып башҡортса шиғыр ятлап тороуын ҙур кинәнес менән ҡарарға була. Татьяна һәм Оля Щерба, Тимофей Богомолов, Анастасия Зеркина һәм башҡаларҙың башҡортса, ярай әҙерәк акцент та булһын ти, шиғыр ятлауы – оло кинәнес, башҡорт теленең тантанаһы ла.
"SHAWSHOW ENTERTAINMENT" ойошмаһы (Генераль директоры Заһир ҡотлосурин), "БашАрт" башҡорт ижади берекмәһе (директоры Заһир Ишкинин), балалар, шиғриәт, тип янып торған яҙыусы апайҙарыбыҙ ‒ Гүзәл Ситдиҡова һәм Гөлнур Яҡупова, "Бәйләнештә" социаль селтәрендә конкурс барышын даими яҡтыртып-таратып торған "Рәми Ғарипов төркөмө", "Башҡортса статустар" төркөмө ысын мәғәнәһендәге халыҡ бәйгеһен күтәреп-дәртләндереп торҙо һәм тора. Артабан да Башҡортостан, башҡорт әҙәбиәте, башҡорт шиғриәте өсөн янып йәшәгеҙ, дуҫтар!
Еңеүселәр кемдәр, тиһегеҙме? Абруйлы яҙыусылар һәм журналистарҙан торған жюри Зөлхизә Ғәликәева ( Сибай ҡалаһы), Руслан Күскилдин, Гөлнара Яҡупова (Өфө), Ислам Төхвәтуллин (Ишембай, Республика кадет мәктәп-интернаты), Алина Ғәлиеваларҙың (Рәми Ғарипов исемендәге 1-се республика башҡорт гимназия-интернаты) сығышын иң шәбе тип тапты.
Шамил ЯУБАҪАРОВ,
“Шоңҡар” журналының бүлек мөхәррире.