20.11.2012 Айһылыу Шәкирова: «Ут булырға кәрәк был тормошта!»

Мин баш ҡалабыҙ Өфөлә донъяға ауаз һалғанмын. Бала сағым йәмле Борай яҡтарында үтте. Башҡорт дәүләт университетының башҡорт филологияһы һәм журналистика факультетының башҡорт-рус бүлегендә бишенсе курста белем алам. Девизым − кешеләге бөтә нимә матур булырға тейеш: йөҙө лә, кейеме лә, күңеле лә, уйҙары ла. Ошо девизға таянып, үҙемде һәр яҡтан үҫтерергә тырышам. Уҡыуҙан тыш ваҡытымды «Һылыуҡай» студияһында үткәрәм, дуҫтарым менән театрҙарға, концерттарға йөрөргә яратам. Гитара ҡылдарын сиртәм, бейергә әүәҫмен.
Ут булырға был тормошта,
Дөрләп янып, йылы өләшеп.
Быҫҡып ҡына сыҡҡан төтөн булһаң,
Һис нигә лә булмаҫ өлгәшеп.

Фәниә ЮЛАНОВА әҙерләне.