05.02.2011 БЕҘҘЕҢ ДӘ КӨЛДӨРГӨ КИЛӘ!
Үҙәк каналдарҙың береһенән күрһәтелгән шаяндар һәм тапҡырҙар клубтары (КВН) юғары лигаһы сығыштарын, ярыштарын күптәр яратып ҡарайҙыр. Илдең, ҡайһы бер күршеләрҙең тамашасылары үҙ командалары өсөн янып-көйһә, беҙҙең республика халҡына бындай бәхет тәтегәне юҡ. Башҡортостан Республикаһы КВН юғары лигаһында ни бары бер генә тапҡыр сығыш яһаған – 1987 – 1988 йылдарҙа Башҡорт дәүләт ауыл хужалығы институты командаһы ярымфиналға тиклем барып еткән. Улар Мәскәү дәүләт университетының командаһынан бер ярым балға ғына ҡалышҡан. Шул ваҡыттан республикабыҙҙың бер генә командаһы ла премьер-лиганан үтә алғаны юҡ. Был нимә: беҙҙекеләр көлдөрә белмәйме, әллә юмор менән булышырға мөмкинлек юҡмы?
Быйыл «КиВиН – 2011» фестивалендә ҡатнашыусы Башҡортостан командалары ярайһы ғына яҡшы уңыштарға өлгәште. Фестиваль һөҙөмтәләре буйынса Стәрлетамаҡ ҡалаһының «СИФК йыйылма командаһы» һәм Өфөнән «Сергеичи» командалары икенсе турға үтте. Тимәк, был командала уйнаусылар «АМИК» телевизион лигаһында һәм фестивалдең гала-концертында ҡатнашыуға дәғүә итә ала. Шулай уҡ беҙҙең республиканан «КиВиН – 2011» фестивалендә ҡанашыусылар араһында юғары рейтингыға өлгәшеп, Халыҡ-ара КВН союзының үҙәк лигаларында ҡатнашыу хоҡуғын яулаусылар бар. Әлеге фестивалдә Рәсәйҙән генә түгел, Германия, Балтик буйы илдәре, Украина, Белоруссия, Грузия вәкилдәре лә булған. Ә инде командалар илебеҙҙең 160 ҡалаһынан йыйылған.
Тимәк, Башҡортостанда ла шаяра белеүселәр һәм ҙур сәхнәгә сығырға, үҙҙәренең ыңғай энергияһын башҡаларға ла бүләк итергә тырышып йөрөүселәр бар, тип әйтергә нигеҙ бар. Яңыраҡ Башҡортостан Республикаһының Йәштәр сәйәсәте һәм спорт министрлығы вәкилдәре, үрҙә телгә алынған сараларҙа ҡатнашыусы республика командалары һәм журналистар осрашты. Әлбиттә, хәбәрселәрҙе, тимәк, халыҡты бер һорау ҡыҙыҡһындыра: ҡасан беҙҙең республика командалары КВН-дың юғары лигаһында сығыш яһар? ҡасан Башҡортостан командаһы, телевидениеның 1-се каналынан күрһәтелгән иң шәп уйындарҙың береһендә ҡатнашып, республикабыҙ данын арттырыр?
Республика кимәлендә үткәрелгән КВН фестивалдәре «йондоҙ»ҙары, йәштәр араһында популярлыҡ яулап өлгөргән командаларҙың етәкселәре әйтеүенсә, юғарыраҡ кимәлдәге сараларҙа ҡатнашыу өсөн беҙҙә потенциал етерлек. Әммә бөтәһе лә аҡсаға барып терәлә. Был, КВН-дың юғары лигаһына барып етеү өсөн кемгәлер аҡса бирергә кәрәк, тигән һүҙ түгел. Сараларҙы ойоштороу өсөн аҡса етмәүе тураһында һүҙ бара.
Билдәле булыуынса, Башҡортостан Республикаһы Президенты Рөстәм Хәмитов, башҡа спорт һәм уйын саралары менән бер рәттән, КВН-ға ла иғтибар артасағын белдергәйне. Шуға ла командалар бөгөн илһамланып ижад итергә әҙер. Әле Башҡортостан шаяндарының йыйылма командаһы бар тип әйтеп булмай. Һәр команда айырым эшләй, иң талантлыларҙы бергә туплау өсөн дә байтаҡ эш эшләргә кәрәк.
Бөгөн беҙҙә талантлы итеп шаяра белеүселәр ҙә, уларға ҡыҙыҡтарҙы уйлап сығарыусы авторҙар ҙа байтаҡ. Шуға ла, күптәрҙе йәлеп иткән был уйынды артабан да үҫтереү республикабыҙ имиджына ла ыңғай йоғонто яһаясаҡ, тип өмөтләнергә кәрәк.
Лилиә СИРАЕВА.