28.02.2014 Илһөйәрлекте – йыр аша
Краснокама районында уҡыусыларҙы патриотик рухта тәрбиәләүгә ҙур иғтибар бүленә. Мәктәптәрҙә балалар һәм йәш үҫмерҙәр ойошмаһы әүҙем эшләй. Ветерандарыбыҙға тимурсылар командалары ҡулдарынан килгәнсә ярҙам күрһәтә, “Изге эштәр эстафетаһы”, “Ветеран”, “Хәтер вахтаһы” акцияларында ҡатнаша.
Уҡыусыларҙа илһөйәрлек тойғоһо тәрбиәләү, Тыуған илгә ҡарата һөйөү уятыу маҡсатында Краснокама районының мәғариф бүлеге Ватанды һаҡлаусылар көнөнә һәм совет ғәскәрҙәрен Афғанстандан сығарыуға 25 йыл тулыу айҡанлы “Һүнмәҫ усаҡ” тип аталған патриотик йыр конкурсы ойошторҙо. Был сараға Афғанстанда хәрби бурысын үтәүселәр, ветерандар, ауыл халҡы, уҡытыусылар саҡырылды. Уҙған йылдың ноябрь айында – конкурстың һайлап алыу, ғинуар айында йомғаҡлау этаптары үтте. Иң яҡшы тип табылған сығыштар “Һүнмәҫ усаҡ” конкурсының гала-концерт программаһына индерелде. 18 февралдә район мәҙәниәт һарайында үткән патриотик йыр байрамында “Вокал-соло”, “Вокаль ансамбль”, “Хор” номинацияларында еңеүселәр ҡатнашты, патриотик йырҙарҙы иң яҡшы башҡарыусылар диплом-грамоталар менән бүләкләнде.
Рәсәй Федерацияһы, Башҡортостан Республикаһы дәүләт символдарын белеүгә арналған республика конкурсының положениеһына нигеҙләнеп, районыбыҙ мәктәптәре араһында “Рәсәй Федерацияһы, Башҡортостан Республикаһы, Краснокама районының гимндарын иң яҡшы башҡарыусылар” конкурсы ла иғлан ителгәйне. Гала-концертта ошо конкурстың еңеүселәре – Ҡуян, Яңы Нуғай, Яңы Ҡайынлыҡ мәктәптәре уҡыусылары илебеҙҙең, республикабыҙҙың, районыбыҙҙың гимндарын яңғыратты.
Гражданлыҡ һәм илһөйәрлек тойғоларын музыкаль-поэтик ижадтың яҡшы өлгөләрендә тәрбиәләүгә йүнәлтелгән “Һүнмәҫ усаҡ” патриотик йыр конкурсы киләсәктә үҙенең һөҙөмтәләрен күрһәтер.
Регина ҒИБӘҘУЛЛИНА.
Краснокама районы.