01.03.2013 “Төшөмлө” бизнес ҡазаһы

ҡайһылар “оҙон аҡса” артынан себер тарафтарына барһа, икенселәр Мәскәү кеүек оло ҡалаларға юллана. Ҙур ҡала, әлбиттә, киң мөмкинлектәр аса. Тик быға ҡайһы күҙлектән ҡарайһың әле... Неф­текама ҡалаһынан ике егет бер нисә йыл Мәскәүгә йөрөп эшләй. Эшләй, тигәс тә, аныҡ эш урындары булмай, ваҡ-төйәк төрлө йомошҡа йөрөйҙәр. Ваҡыты-ваҡыты менән улар тыуған ҡалаларына ла ҡайтҡылаған. “Күстәнәстәр” менән. Мәскәүҙә наркотик күпкә арзан икән, уны табыуы ла еңел. Егеттәр баш ҡалала героин алып, Нефтекамала уны бер нисә тапҡыр ҡиммәтерәк хаҡҡа һатҡан. Үҙҙәре күптән энәгә ултырған, шуға клиент табыуы ауырлыҡ тыуҙырмаған.
Ошо көндәрҙә “эшҡыуар” егеттәрҙе Яңауыл ҡалаһының тимер юл вокзалында Башҡортостан Респуб­ликаһы буйынса Наркотиктарҙың законһыҙ әйләнешен контролләүсе федераль хеҙмәт оперативниктары туҡтата. Тентегән ваҡытта 44 доза героин табылған. Әлеге мәлдә тикшереү эштәре бара. Ғәйептәре раҫланһа, Мәскәү алыпһатарҙарын яза көтә.
Ә Өфө ҡалаһында дезоморфин менән сауҙа итеүсе 31 йәшлек ир ҡулға алынған. Уның ғәйебен раҫлар өсөн закон һаҡсылары махсус операция үткәрә. “Шартлы һатып алыусы” наркотик алғас та “бизнесмен”ды эләктерәләр. Тәфтишселәр, ҡаланан бер ҡайҙа ла китмәү шарты менән, судҡа тиклем тип, уны иреккә сығара. Дезоморфин һатҡаны өсөн уға ун йыл төрмә янай.
Бер тапҡыр законды боҙғанһың икән, тәүбәгә килеп тәртипле генә йөрөргә ине лә бит. Тик ир берҙән-бер шаһитты – “шартлы һатып алыусы”ны эҙләргә тотона. Бер айҙан уны таба һәм тәфтишсегә биргән күрһәтмәләрҙән баш тартырға, судта уның файҙаһына сығыш яһарға өгөтләй. Әммә шаһит баш тарта, бүтән бимазаламауын һорай. Ярһыған ир уны подъезда ҡарауыллап тора һәм һыу эскеһеҙ итеп туҡмай. Хәҙер иргә ҡарата тағы бер енәйәт эше ҡуҙғатылды. Ошо ике ҡылығы өсөн ул 13 йылға иркенән мәхрүм ителәсәк.
Г. ЯХИНА.