«Йәшлек» гәзите » Һаулыҡ һаҡлау » Бер юлы ике шатлыҡ



15.05.2012 Бер юлы ике шатлыҡ

Күгәрсен районының Түбәнге Һаҙ ауылында, Семиречье утарында фельдшер-акушерлыҡ пункттары асылды
Башҡортостан Республикаһы Президенты беҙҙең районға эш сәфәре барышында һаулыҡ һаҡлау мәсьәләһен күтәреп сыҡҡайны. Ауылдарҙа урынлашҡан ФАП-тарҙың (фельдшер-акушерлыҡ пункты) хәле тураһында ла күп һүҙ әйтелде был осрашыуҙа.
Районыбыҙҙа 52 ФАП бар. Уларҙың күбеһе күптән төҙөлгән бәләкәй биналарҙа урынлашҡан. Техник йыһаздары ла яҡшынан түгел.
Шуныһы ҡыуаныслы: хәл яҡшыға үҙгәрә – ай ярымда ике ауылда өр-яңы фельдшер-акушерлыҡ пункты төҙөлөп, сафҡа индерелде.
7 майҙа Түбәнге Һаҙ ауылы халҡы ҙур ҡыуаныс кисерһә, Еңеү көнөндә иһә Семиречье утарында ал таҫмалар ҡырҡылды.
Яңы биналарҙы асыу тантанаһында район хакимиәте башлығы Фәрит Мырҙагилде улы Мусин:
– Кешеләрҙең һаулығын ҡайғыртыу беҙҙең төп бурыс­тарыбыҙҙың береһе булып тора. Республикала ошо көндәрҙә асылған өс ФАП-тың икәүһе беҙҙең районда булыуына шатбыҙ. Үҙебеҙҙең төҙөүселәр һынатманы, улар­ға рәхмәт. ҡыҫҡа ғына ваҡыт эсендә ниндәй матур биналар төҙөнөләр. Тиҙҙән Се­миречьела башланғыс мәктәп төҙөй башлаясаҡбыҙ, Кү­гәрсен, Побоище ауылдарында мәҙәни үҙәктәр яңыртыла. Мораҡ ауылында ҙур балалар баҡсаһы төҙөлә, Йомағужала реабилитация үҙәге реконструкциялана. Ауылда йәшәүселәргә бөтә яҡлап ярҙам ҡулы һуҙырға тырышабыҙ, – тине.
Ҙур ижтимағи әһәмиәткә эйә булған фельдшер-акушерлыҡ пункты асылыу – ауыл халҡы өсөн ҙур ҡыуаныс. Кеше һау булһа, донъяһы ла теүәл: сөнки һаулыҡ – ҙур байлыҡ.

Ринат ӘЛИМҒУЖИН.







Сайтҡa күcергәБаҫып cығарырға