01.12.2018 Дәфнә дауаһы
Дәфнә (лавр) япрағын күптәр ни бары аш тәмләткесе итеп ҡуллана. Ә ул бактерияларҙы үлтереүсе иң яҡшы үҫемлектәрҙең береһе булып һанала. Шуға күрә дәфнәне өйҙә үҫтереү ҙә файҙалы. Уның япраҡтары туберкулез таяҡсалырын юҡҡа сығарыусы фитоцидтар бүлеп сығара. Тағы ла ауыҙ ҡыуышлығы ауырыуҙарынан, ангинанан ярҙам итә.
– Быуындар һыҙлауынан 1 ҡалаҡ кипкән һәм ваҡланған дәфнә (лавр) япрағын 1 стакан үҫемлек майына һалырға һәм парҙа (“һыу мунсаһында”) 30 минут тоторға кәрәк. Унан һуң һөҙөргә, һыҙлаған урынға һөртөргә.
– Һалҡын төшөү менән күптәргә герпес сығып, ирендәре боҙола. Был мәкерле вирус бер яфалай башлаһа, ай һайын тәнгә сығыуы бар. Хроник рәүештә герпестан ыҙа сигеүселәр дәфнә ярҙамында дауалана ала. Сөнки ул вирустарҙы юҡҡа сығара, иммунитетты күтәрә. Герпестан көн һайын уртаса дәфнә япрағын бер стакан ҡайнар һыуҙа төнәтеп эсергә кәрәк. Бер аҙна үткәс, төнәтмәне көн аша ҡабул итергә, өсөнсө аҙнала – ике көн аша. Ошонан һуң туҡтарға мөмкин. Ә дауам итеүселәр дүртенсе аҙнала – ике тапҡыр, һуңғыһында бер тапҡыр был төнәтмәне эсһен.
– Дәфнә ҡандағы шәкәр кимәлен кәметеү өсөн дә бик файҙалы. Ярты литр ҡайнар һыуға һигеҙ япраҡты һалып, термоста яҡынса алты сәғәт төнәтергә. Ярты сынаяҡтан саҡ ҡына кәмерәк төнәтмәне йылы килеш ашарҙан алда эсергә.