16.10.2010 Яңы йылға күтәренке кәйеф менән
Шулай итеп, Рәсәй йыйылма командаһы, 2012 йылда буласаҡ Европа беренселегенә эләгеү өсөн үҙ төркөмөндә ике мөһим уйында ике еңеү яулап, быйылға миҙгелде уңышлы тамамланы. Сөнки ҡайһы бер командалар ярҙамында ул үҙ төркөмөндә иң юғары баҫҡысҡа үрмәләне. Беҙҙең төп дәғүәселәр булып һаналған Ирландия менән Словакия футболсылары үҙ-ара 1:1 иҫәбенә уйнаны. Ә инде Рәсәй командаһы үткән осрашыуҙа Македония уйынсыларын 1:0 иҫәбенә отто. Ғөмүмән, осрашыу әллә ни көсөргәнешле уҙмаһа ла, Рәсәй футболсыларының һүлпән уйнауы саҡ иҫәпте тигеҙләүгә килтермәне. Ярай әле ҡапҡасы Игорь Акинфеев, ҡапҡабыҙға тәғәйенләнгән пенальтиҙы уңышлы ҡаҡлыҡтырып, иптәштәрен, дөрөҫөрәге, Рәсәйҙе юғалтыуҙан ҡотҡарҙы.
Еңдек. Шулай уҡ беҙҙең төркөмдә уңышлы старт алған Әрмәнстан футболсылары ошо уҙған турҙа Андорра командаһын 4:0 иҫәбенә еңеп ҡайтарҙы. Ә инде быға тиклем Рәсәй еңә алмаған Словакия уйынсыларын улар үҙендә 3:1 иҫәбенә отто. Ул ғына ла түгел, Ирландия менән Словакия командаларын уҙып, төркөмдә икенсе урынға сыҡты. Хәҙер инде киләһе йылдың март айы етеүен түҙемһеҙләнеп көтәсәкбеҙ. Сөнки Әрмәнстан 26 мартта үҙендә Рәсәй футболсыларына ҡаршы һынау тотасаҡ. Ә әлегә «В» төркөмөнөң турнир таблицаһы ошолай:
У. Е. Т.и. Е-леү Т. М.
1. Рәсәй 4 3 0 1 6 – 3 9
2. Әрмәнстан 4 2 1 1 9 – 4 7
3. Ирландия 4 2 1 1 7 – 5 7
4. Словакия 4 2 1 1 4 – 4 7
5. Македония 4 1 1 1 4 – 4 4
6. Андорра 4 0 0 4 1 – 11 0