14.09.2010 Президент фатиха бирҙе

Республика башлығы Рөстәм Хәмитов «Салауат Юлаев» хоккей клубының баш тренеры Вячеслав Быков менән осрашты.
Улар, башлыса, республикала хоккейҙың үҫеше, спортсылар менән эшләүҙең яңы алымдарын индереү, балалар хоккей командаларына ярҙам итеү тураһында һөйләште. Әлбиттә, был миҙгелдәге Континенталь хоккей лигаһының өсөнсө чемпионатындағы сығыш хаҡында ла һүҙ булды. Бер нисә көн элек кенә юлаевсылар, БР Президенты кубогында ҡатнашып, сираттағы еңеүен яулағайны. Рөстәм Хәмитов уйынсыларҙы һәм тренерҙарҙы лайыҡлы еңеүҙәре менән тағы бер тапҡыр тәбрикләне. Вячеслав Быков иһә Президенттың матчҡа килеп, үҙ командаһы өсөн ысын көйәрмән булыуы менән ғорурланыуын белдерҙе.
КХЛ-да «Салауат Юлаев»ҡа ҙур өмөттәр бағлана. Бөтә Башҡортостан халҡы түҙемһеҙлек менән сағыу еңеүҙәр көтә. Рөстәм Зәки улы ла баш тренерға шундай теләктәр еткерҙе.