05.06.2019 Дини байрамдар сит төбәктә милли үҙаңды һаҡларға булышлыҡ итә

Нурия ИҠСАНОВА хәбәр итә:

Сит төбәктә йәшәүсе милләттәштәребеҙгә дини байрамдар башҡортлоҡто һаҡларға ярҙам итеүсе төп сараларҙың береһе булып тора.
Рамаҙан айы дауамы мосолмандар мәсеттәргә йыйыла, үҙ телендә аралаша, милли матбуғат менән таныша. Урал федераль төбәгендәге БР даими вәкиллеге Башҡортостандың йөҙ йыллығы уңайынан дини сараларҙы башҡорт мәҙәниәтенә бағышланы. Ошондай саралар Силәбе һәм Екатеринбург ҡалаларында үтте.

Урындағы милли ойошмалар ҙа был сараға дәррәү ҡушылды. Улар милли йыһаздарҙан күргәҙмә әҙерләне, мөнәжәттәр башҡарҙы, милли ризыҡтар әҙерләне. Хабрахман Мансуров милләттәштәренә ҡурай моңон бүләк итте.

Екатеринбург ҡалаһына Үзбәкстан вәкиллеге хеҙмәткәрҙәре лә килде. Улар ҡан-ҡәрҙәштәре – башҡорттарҙың бай мәҙәниәте менән танышты, Башҡортостан менән һәр ваҡыт хеҙмәттәшлек итергә әҙерлеген белдерҙе. Сарала башҡорт тарихына бағышланған Салауат Хәмиҙуллиндың фильмдары һәм «Уралым» телетапшырыуы командаһы әҙерләгән видеороликтар күрһәтелде. Сәхнәнән мөнәжәттәр әйтелде.

Екатеринбургта башлыса Башҡортостандан күсеп килеүсе башҡорттар йәшәй. Төрлө мәҙәни өлкәләрҙә, өлкә хакимиәтендә һәм урындағы дини назаратта беҙҙең милләт вәкилдәре эшләй, ең һыҙғанып үҙ халҡына хеҙмәт итә. Мәҫәлән, ҡала мәсете имамы Айнур Закиров сығышы буйынса Силәбе өлкәһенең Арғаяш районынан. Милләттәштәрен туплап ул төрлө саралар үткәрә. Бөгөн дә ир уҙаманы табынды башҡорт балы менән тәьмин итте, бүләктәр таратты, мөнәжәт һөйләне. Эшҡыуар Илдар Ҡарабаев сараға матди ярҙам күрһәтте.