31.05.2019 ХУШЛАШҠАНДА

Бөгөн яҙ менән хушлашыу көнө. Иртәгә йәй етә.

Ошо айҡанлы Хәлиҙә апай ИШДӘҮЛӘТОВА шиғыр яҙған:

Хушлашҡанда яҙ көндәре менән,
Нимә әйтергә лә белмәйем.
Киләһе яҙҙа ла һәммәбеҙгә,
Осрашыуҙы бары теләйем.

Һау бул яҙым киләһе йылғаса,
Күрешербеҙ әле тағын да.
Эсер һыуҙар һыуһын ҡандырһындар,
Аш-һыуҙар мул булһын табында.

Аяҙ, тыныс торһон зәңгәр күк тә,
Һулар һауа булһын сафтан-саф.
Туған менән туған ай(ы)рылмаһын,
Ай(ы)рылмаҫтай тауҙа таштан таш.

Барыбыҙға оҙон ғүмер, һаулыҡ,
Тик бәхет өләшһен Хоҙайым!
Кисен ятып, иртән торғанда ла,
Аллаһымдан шуны һорайым.

Беҙ бит Әҙәм-Һауа балалары
Йәшәр өсөн ергә килгәнбеҙ.
Йәшәү хаҡы ҡыйбат икәнлеген,
Ергә килгәндә үк белгәнбеҙ.

Был донъяның белеп ҡәҙерҙәрен,
Дер һелкетеп йәшәп ҡалайыҡ!
Яҡты донъяның гүзәллегенә,
Күңел күҙе менән ҡарайыҡ!