18.05.2019 Помидорға айырым иғтибар
Күптәр көндәр йылытыу менән помидор үҫентеләрен теплицаға сығарып ултырта башлай һәм тамыр ебәрһен өсөн күп итеп һыу ҡоя. Былай эшләү дөрөҫ түгел. Сөнки үҫемлектең тамыры төпкә китмәй, өҫтә генә үҫә. Һыу аҙ булғанда, тамырҙар төпкә дым эҙләп китә. Помидор үҫә барған һайын һыуҙы аҙ итеп, әммә йышыраҡ һибегеҙ.
Үҫемлектәр бер ай теплицала үҫкәс, аҫҡы япраҡтарын йолҡоп ташлайҙар. Йәшелсә яҡшылап һеркәләнһен, емештәре төймәләнһен өсөн теплицала яҡшы шарттар тыуҙырыу мөһим. Көндөҙ температура 22 – 25, төндә 16 – 18 градус булырға тейеш. 13 градустан түбән булһа, үҫемлектәр һеркәләнмәйәсәк. Дымлылыҡ 60 проценттан артмаҫҡа тейеш.
Помидорға үтәнән-үтә иҫеп торған ел дә файҙалы. Уның һабаҡтарын ваҡыт-ваҡыты менән һелкетеп алыу ҙа кәрәк. Көндөҙ теплицағыҙҙы елләтеп алырға ла онотмағыҙ. Дымлылыҡ юғары булғанда бәшмәк ауырыуҙары тарала.