13.07.2010 Әгәр аҡса эшләргә теләһәң...

Йәштәр мәшғүллегенә булышлыҡ итеүсе республика үҙәге үҫмерҙәргә йәйге ялда эшкә урынлашыу мөмкинлеген бирә. Был йәйҙә Йәштәр мәшғүллегенә булышлыҡ итеүсе республика үҙәге бәлиғ булмағандар өсөн туңдырма һатыусылар, официанттар, курьерҙар, промоутерҙар, ярҙамсы эшселәр, йыуыусылар вакансияларын тәҡдим итә. Бөтә ерҙә лә уҫмерҙәрҙең эш шарттары, айырыуса хәүефһеҙлек саралары ныҡ тикшерелә. Уларҙы ҡануниәттә билдәләнгән нормаларҙан артыҡ эшләтеү юҡ.

Үҙәк директоры Гөлләриә Ялсыҡаеваның һүҙҙәренсә, йәйге осорҙа үҫмерҙәрҙең мәшғүллеге – көнүҙәк мәсьәләләрҙең береһе. Был мәсьәлә менән БР Хеҙмәт һәм халыҡты социаль яҡлау министрлығы ҡарамағындағы Халыҡ мәшғүллеге буйынса дәүләт идаралығы, Йәштәр сәйәсәте, спорт, туризм министрлығы, республика ҡалалары һәм райондарындағы йәштәр эштәре буйынса органдар ҙа шөғөлләнә.

– Йыл башынан май айына тиклем беҙҙең белгестәр ярҙамында 1500 кеше эш урыны тапты, – ти Гөлләриә Ялсыҡаева. – Йәй башланыуға эшһеҙ йәштәрҙең һаны артты. Июндә генә беҙгә 700 кеше эш һорап мөрәжәғәт итте.

Йәштәрҙе эш менән тәьмин итеүҙең тағы бер формаһы – студенттарҙан торған хеҙмәт отрядтары. Был ысул йәштәрҙең аралашыуын, яңы профессия үҙләштереүен ойоштороу өсөн дә бик уңайлы. Быйыл өсөнсө хеҙмәт сирегендә 6000 студент ҡатнашасаҡ. Улар республиканың төрлө мөйөштәрендә эшләйәсәк, бәғзеләре Рәсәйҙең икенсе төбәктәренә лә ебәреләсәк. Йәй буйы 11000 үҫмергә яңы профессия үҙләштереү һәм аҡса эшләү мөмкинлеге биреләсәк. Студотрядтағыларҙың хеҙмәт хаҡы – 4 мең һумдан 15 мең һумға тиклем.

Күңеленә ятышлы эш табырға теләүселәр булһа, Йәштәр мәшғүллегенә булышлыҡ итеүсе республика үҙәгенә ошо адрес буйынса шишәмбе, шаршамбы, кесе йомала мөрәжәғәт итә ала: Өфө ҡалаһы, Ленин урамы, 10, 13-сө бүлмә.