20.11.2015 "Ихлас йөрәктән, һеҙҙең Вәхит…"

Вәхит Хызыровтың ижадын күптәр үҙ итә. Кемдәр генә уның моңло тауышын ишетеп һоҡланмай икән... Ошо көндәрҙә билдәле йырсының юбилейына арналған тамаша көтөлә.
Үҙенә башҡа бер музыкаль һәләткә эйә ул. Яғымлы йырсының асыҡ лирик тенорлы тауышы үҙенең асыҡлығы һәм ихласлығы менән тыңлаусыларҙы арбай.
Репертуар һайларға йырсыға тәбиғи булмышы һәм үҙенә ҡа­рата юғары талапсанлығы ярҙам­ға килә. Киң һәм күп жанрлы репертуарында рус, украин халыҡ йырҙары, башҡорт халыҡ йырҙарына интерпретациялар урын алған.
Айырым урынды М. Глинка, П. Чай­ковский, С. Рахманинов, Н. Римский-Корсаков, А. Дар­гомыжский, А. Варламов, А. Яков­лев, П. Булахов, Н. Ка­листратов кеүек рус компо­зитор­ҙарының романстары алып тора. Шулай уҡ үҙенең ижади багажына Вәхит Хызыров йыш ҡына З. Исмәғилев, Х. Әх­мәтов, Н. Сабитов, С. Низа­метдинов кеүек билдәле баш­ҡорт композитор­ҙарының әҫәр­ҙәрен дә индерә.
Уның матур тауышы Халыҡ ҡоралдары милли оркестры, Башҡортостан Республика­һының Милли симфоник оркестры, Башҡорт дәүләт опера һәм балет театры оркестры менән берлектә яңғырай.
Быларҙың барыһын да 30 ноябр­ҙә “Башҡортостан” дәүләт концерт залында Вәхит Хы­зы­ровтың юбилей кисәһендә ише­тә алаһығыҙ. “Ихлас йөрәктән, һеҙҙең Вәхит…” исемле тамашала юбилярҙың ижадташ дуҫтары һәм уҡыусылары ҡатнаша.
Һеҙ ниндәй уҡытыусы, тигән һорау­ға: “Бик талапсанмын... Ҡайһы бер йомшаҡлығым үҙемә ҡамасаулап та ҡуя. Студенттар балаларым кеүек, уларға хатта үҙемдең улыма ҡарағанда ла күберәк ваҡыт бүләм. Уҡыусыларымдың ихтирамын һәм һөйөүен тойоп йәшәйем, шуның менән бәхетлемен”, – ти йырсы.
Кисәнең эксклюзив ҡушымтаһы булып артистың “Улым” тип исемләнгән китабының презентацияһы ла көтөлә.

Н. АҙНАБАЕВА.