11.11.2013 Салауаттар донъя чемпионатын ҡабул итәсәк
Был аҙнала Салауат ҡалаһында ҙур спорт сараһы – билбаулы көрәш буйынса донъя чемпионаты уҙасаҡ. Ул ике көн буйы – 14 - 15 ноябрҙә үтәсәк һәм унда Швеция, АҠШ, Канада, Греция, Төркиә, Беларусь Республикаһы, Латвия, Израилдән - йәмғеһе 20 илдән 300 көрәшсе ҡатнашасаҡ. Был сара киләһе йыл Өфөлә үтәсәк ШОС һәм БРИКС саммиттарына әҙерлек планына ярашлы ойошторола.
Рәсәй йыйылма командаһы иҫәбендә Башҡортостан көрәшселәре лә бар. Улар - БДАУ-ҙың агрономия факультеты студенты, билбаулы көрәш буйынса халыҡ-ара класлы спорт мастеры, ике мәртәбә донъя чемпионы, Мәләүез районында тыуып үҫкән Альберт Рәхмәтуллин, шул уҡ юғары уҡыу йортон быйыл тамамлаған Наиль Мөхәмәтйәнов, Рәсәй Эске эштәр министрлығының Өфө юридик институтында физик әҙерлек буйынса уҡытыусы булып эшләгән Рөстәм Арыҫланов, Өфөнөң 14-се балалар һәм үҫмерҙәр спорт мәктәбе тренеры Рәдиф Аҡсурин.
Беҙҙең спортсыларға һәм Рәсәй командаһына уңыштар теләйбеҙ!
Оҡшаш яңылыҡтар
