05.08.2013 Бурысҡа ла алып торған, өҫтәүенә аҡса урлаған

Октябрьский ҡалаһында йәшәгән 53 йәшлек ҡатын, йортона пластик тәҙрәләр ҡуйҙырырға иҫәп тотоп, аҡсаһын йәшергән урынды ҡараһа, ундағы 30 мең һумдың юҡҡа сыҡҡанлығын күрә. Аптыранған хужабикә үҙенең шиген кисә генә килеп, бурысҡа аҡса һораған 63 йәшлек дуҫ ҡатынына йүнәлтә.
Шуныһы асыҡлана – был ҡатын менән ул яңыраҡ дуҫлашҡан. Танышы үҙенең ауыр матди хәлдә булыуын, ейәнсәренә ярҙам кәрәклеген белдергән һәм уртаҡ таныштар аша бурысҡа аҡса биреүселәрҙе эҙләгән. Ә йорт эйәһенең ремонтҡа тип йыйып ҡуйған аҡсаһы булған. Ул күп уйлап тормайынса, был яңы танышҡан ҡатынға 100 мең һум аҡса биреп тора. Бер аҙҙан тағы ла 26 мең һумды бурысҡа бирә.
Бурысҡа алған ҡатын июль уртаһына тиклем аҡсаны ҡайтарырға һүҙ бирә һәм расписка яҙа.
Бер көндө был хаҡлы ялда булған ҡатын танышына йәнә килеп аҡса һорай. Уныһы күҙ алдында купюралар һалынған полиэтилен төргәкте сығарып, 14 мең һум аҡса сығарып бирә. Ҡунағын һыйларға тип, йорт хужабикәһе ике мәртәбә баҡсаға сығып инә. Бер аҙҙан теге ҡатын ҡайтып китә.
Иртәгеһен йорт хужабикәһе комодта ятҡан төргәктән аҡса юғалғанын белеп ҡала. Ул полицияға шунда уҡ мөрәжәғәт итмәй һәм аҡсаны кире ҡайтарып бирер тип танышының эшенә, йәшәгән еренә барып йөрөй. Ләкин аҡса бурының эҙе юғалған була.
Әлеге ваҡытта «Урлашыу» статьяһы буйынса енәйәт эше асылған. Ҡатын 126 мең һум аҡсаны алып, кире ҡайтармаған өсөн мутлашыуҙа ла ғәйепләнә. Әлеге ваҡытта уны хоҡуҡ һаҡлаусылар эҙләй.