04.04.2019 Бутлегерҙар һаман бойһонмай

Республикала эскелеккә ҡаршы көрәш ысулдары тәҡдим ителә. Мәҫәлән, Борай районы хакимиәте башлығы Рөстәм Исхаҡов, легаль булмаған алкоголь һатыусылар хаҡында мәғлүмәт өсөн үҙенең “ватсап” номерын биргән. Эскелек таратыусыларҙы үҙем контролдә тотасаҡмын, тип вәғәҙәләй етәксе.


Әбйәлил районына яңы хужа тәғәйенләнгәс, иң тәүҙә ауылдарҙың алкоголь һаҙлығына батып барыуына ҡаршы ҡаты саралар күрә башланы. Район легаль булмаған иҫерткес эсемлек һатыусыларға ҡаршы ойошторолған рейдтарҙан шаулап торҙо. Тик ундай сараларҙы көн дә ойоштороп булмай – язанан бер ниндәй ҙә фәһем алмаусылар, “дауыл” тынғас, яңынан өйрәнгән шөғөлөнә тотондо. Мәҫәлән, бер ауылда урындағы магазин тотоусы ир эскеселәрҙең банк картаһын йыйып алған. “Ирле - ҡатынлы пенсионерҙар Р.-ға икеһенең дә картаһын биреп ҡуйған. Пенсия күскәс, магазин хужаһы өй буйлап йәшникләп суррогат араҡы таратып сыға. Сөнки уға картаһын “ышанып” тапшырған клиенттар етерлек. Ҡомһоҙлоҡтоң сигенә сыҡҡан был ир тамаҡ сылатырға яратыусыларҙы ошо рәүештә даими һатып алыусыһына әйләндергән, карталарын хатта ҡулдарына ла тоттормай! Ғөмүмән, ауылыбыҙҙа барлыҡ магазинда Ҡаҙағстанда етештерелгән йәки легаль булмаған араҡы һаталар”, — тип һөйләне танышым. Әйткәндәй, “кәпәс”тәрҙе яңыса һүҙ менән бутлегер тип атайбыҙ. Бутлегер бизнесы — инглиз теленән аҫтан спиртлы эсемлек һатыусы тип тәржемә ителә.

Ҡоро оран һалыу етмәй, штраф ярҙам итмәй, артабан ни эшләргә? Нисек итеп араҡы менән сауҙа итеүҙе килемһеҙ табышҡа әйләндерергә? Бөтә ауыл менән бутлегерҙың йортон баҫып барып талап итергәме? Бөгөн республикала райондар һәм ҡалаларҙа сходтар үткәреү графигы төҙөлгән — был һорауға яуапты әүҙем гражданлыҡ позицияһы күрһәтеп сходтарҙа күмәкләп эҙләйек!