11.03.2019 Ҡышын юлды ҡар баҫа, ә йәйен – соҡор

Эй-й, беҙҙең юлдарҙың төрлөлөгө! Ул асфальты, ул соҡоро, ул машинаһы, ул юлһыҙлығы, тигәндәй. Мәңгелек тема бит ул – юлдарыбыҙҙың торошо.

Әлеге ваҡытта ҡар итеп бөтһә, ҡайһы юлда ниндәй ремонт талап ителгәнлеге күренә. Күренә генәме ни! Машинаң соҡорға лап итеп төшһә, матур һүҙҙәреңде бер ҙә йәлләп тормайһың. Шулай итеп, юл соҡорҙарын ремонтлау (ямочный ремонт) мәле етә, йәмәғәт. Ә соҡорҙар һәр ваҡыт мул була.

Әйткәндәй, соҡорҙо беҙҙә “һалҡын асфальт” менән ҡыш та ямайҙар. Ә эҫе материал менән ямау өсөн 15 апрелде көтөргә кәрәк. Һауа торошона бәйле был. Муниципаль-ара, төбәк әһәмиәтендәге юлдарҙа ремонт эштәрен 15 июнгә тиклем тамамлау күҙаллана.

Әле һалҡын ысул менән һалыр өсөн асфальт-бетон ҡатнашмаһы етерлек. Эҫе асфальт-бетон етештереү өсөн 15 апрелгә тиклем 26 завод булдырылырға тейеш. Ошо йомала Ҡырмыҫҡалы районында юл соҡорҙарын ремонтлау буйынса мәсьәләләр ҡаралған күсмә семинар үтәсәк.
Соҡорҙарҙы ямауға бәйле ил төбәктәренең яҡшы тәжрибәһен өйрәнеү дауам итә, интерактив карта төҙөлә. Һанаулы көндәрҙә ул әҙер булырға тейеш. БР Юл хужалығы идаралығының рәсми сайтында насар юлдарҙы күрһәтеп, фото ла һалырға мөмкин буласаҡ. Картаның мобиль ҡушымтаһы эшләнәсәк. Уның 1 апрелгә әҙер булыуы шарт. Республика етәксеһе Радий Хәбиров шундай бурыс ҡуйҙы. Уның был күрһәтмәһе үтәлмәгән хәлдә яуаплыларға ҡарата етди сара күреләсәк. Әле әҙерлек насар, тине Башлыҡ. Әгәр ҙә миңә бының киреһен иҫбатлаһағыҙ, мин һеҙҙең алда ғәфү үтенәсәкмен, тип тә өҫтәне.