22.01.2019 Сибай: эштәр, маҡсаттар, ярҙам

БР Хөкүмәтенең бөгөнгө оператив кәңәшмәһе Сибай карьерында килеп тыуған хәл буйынса сығыштан башланды. Һуңғы яңылыҡтар һәм эш барышы менән видеобәйләнеш буйынса Сибай хакимиәте башлығы Рөстәм Афзалов таныштырҙы.

Әле ҡалала өс йүнәлеш буйынса проблеманы хәл итеү ойошторолған. Беренсенән, карьерҙың үҙендә эштәр алып барыла, икенсенән, һаулыҡ һаҡлау саралары, шул иҫәптән республика медиктары ярҙамында, өсөнсөнән, әгәр ҙә хәл-торош ҡатмарланып киткән осраҡта халыҡҡа хәбәр итеүҙе ойоштороу буйынса. Ҡыҫҡаһы, етәкселек комплексы саралар билдәләп, шуны контролдә тотоп эшләргә тырыша.

Карьер тигәндән, ундағы ағыулы матдәләрҙең йоғонтоһон кәметеү өсөн төпкә махсус шыйыҡлыҡ ағыҙыла. Проблеманы хәл итеүҙә Мәскәү, Магнитогорск, Екатеринбург ҡалаларының дүрт ғилми институты белгестәре лә ҡатнаша. Фекер алышыуҙарҙа Сибай карьерын һәм Яңы Сибай тау ятҡылыҡтарының ер аҫтын өлөшләтә һыу (ҡатнашма) менән тултырыу ҡаралған. Шахтанан технологик ҡорамалдарҙы, кабель-сымдарҙы сығарыу өсөн комбинат етәкселеге бер аҙна самаһы ваҡыт кәрәклеген белдерә. Әйткәндәй, карьерға һыу ваҡытлыса төшөрөлә.

Һаулыҡ һаҡлау йүнәлешендәге эштәргә килгәндә, ҡала хакимиәте башлығы әйтеүенсә, республиканың медицина учреждениеларынан кисә тағы ла 31 белгес килгән. Дауаханала, поликлиникала сират кәмегән тиергә була. Сибайҙың 69 урамында, йәғни предприятиеға яҡын йәшәүселәр айырыуса тикшереләсәк. Бында 500 һәм 1000 метр арауыҡ тураһында һүҙ бара. Ҡырымға бара торған балалар ҙа, моғайын, үрҙә һанап кителгән урамдарҙан һайланалыр.

Артабан да кеше һаулығы өҫтөнлөклө мәсьәлә булып ҡаласаҡ.