16.11.2010 Боҙ урынынан ҡуҙғалды шикелле

Әлеге ваҡытта Башҡор­тостан биләмәһендә төҙөлөп бөтмәгән күп ҡатлы 25 йорт иң проблемалы тип иҫәпләнә.
Уның сәбәбе – ҡайһы бер төҙөүселәрҙең үҙ эшенә яуаплы ҡарамауы, оҙайлы төҙөлөш ту­раһындағы закон талаптарының үтәлмәүе һәм 2008 – 2009 йылғы көрсөктөң эҙемтәләре. Һөҙөм­тәлә ике меңдән ашыу кешенең хоҡуҡтары боҙолған.
Төҙөүселәрҙең күп ҡатлы йорт төҙөү буйынса бурыстарын үтәмәүе һөҙөмтәһендә зыян күреүсе граждандарҙың законлы мәнфәғәттәрен һәм хоҡуҡтарын яҡ­лауға булышлыҡ итеү буйынса ведомство-ара комиссия, БР Дәүләт төҙөлөшө һәм урындағы үҙидаралыҡ органдары тарафынан 12 йортто төҙөп бөтөү бу­йынса саралар планы ҡабул ител­гән һәм тормошҡа ашырыла. Мәҫәлән, Өфө ҡалаһының Гоголь һәм Красин урамдары киҫелешендәге торлаҡ йорттоң А, Е секциялары, Салауат ҡала­һының 4-се микрорайонындағы 2-се йорт файҙаланыуға тапшырылыу стадияһында. БР Төҙө­лөш һәм архитектура буйынса дәүләт комитетынан хәбәр итеү­ҙәренсә, башҡа объекттар бу­йын­са мәсьәләне хәл итеү өсөн хоҡуҡи һәм практик механизмдар ҡарала.
– Алданған өлөшсөләр мәсьә­ләһе – ҡатмарлы тема. Һәр объект 200 – 300 млн һум тора, – ти БР Дәүләт төҙөлөшө рәйесе Хәлит Мәхмүдов. – Беҙ был объекттар буйынса эшләйбеҙ, әммә мәсьә­ләне хәл итеү еңелдән түгел.