07.09.2010 Өс һөйләм менән
Рәсәй Президенты менән РФ Йәмәғәт Палатаһының тәҡдиме нигеҙендә урман янғындарынан зыян күреүселәргә ярҙам күрһәтеү дауам итә. Ошо маҡсатта «Россельхозбанк»тың Башҡортостан төбәк филиалы хеҙмәткәрҙәре лә фондҡа бер көнлөк хеҙмәт хаҡын күсерҙе. 6 сентябргә ҡарата төрлө ойошмаларҙан әлеге иҫәпкә 400 мең һумдан ашыу аҡса күсерелгән дә инде.
«Өфө моторҙар эшләү производство берекмәһе» асыҡ акционерҙар йәмғиәте «1941–1945 йылдарҙағы Бөйөк Ватан һуғышында Еңеү» миҙалы менән билдәләнде. Юғары награда бирелеүен раҫлаусы «Еңеү» Рәсәй ойоштороу комитетының дипломына Рәсәй Президенты Дмитрий Медведев ҡул ҡуйған. Иҫтәлекле миҙал ветерандар менән әүҙем эш алып барған, граждандарға патриотик тәрбиә биреүҙә ҡатнашҡан һәм Бөйөк Еңеүҙең 65 йыллығын үткәреүгә ҙур өлөш индереүселәргә тапшырыла.
Һаулыҡ һаҡлау министрлығынан хәбәр итеүҙәренсә, йыл башынан республикала 847 ВИЧ-инфекциялы теркәлгән. Ауырыуҙарҙың 472-һе – ир-егет, 375-е – ҡатын-ҡыҙ, СПИД-ҡа ҡаршы көрәш үҙәгендә 223 ауырлы ҡатын иҫәптә тора. Ағымдағы йылда ауырыусылар һаны республика буйынса йөҙ мең кешегә 20,28 тәшкил иткән, был, былтырғы осор менән сағыштырғанда, биш процентҡа күберәк.
Ай аҙағына баш ҡалала аквапарк төҙөү перспективаһының асыҡланыуы ихтимал. Комплекс проектын Англияның «Benoy» бюроһы әҙерләгән. 120 миллион доллар тип баһаланған ҡоролманы «ҡашҡаҙан» паркында күтәрмәкселәр.
Сибай ҡалаһы мәғариф учреждениеларында граждандар именлеге айлығы башланды. Сара барышында ғәҙәттән тыш хәл тыуа ҡалған хәлдә уҡыусыларҙы һәм уҡытыусыларҙы эвакуациялау буйынса күнекмәләр үткәрелә, махсус викториналар, конкурстар ойошторола. Шулай уҡ Ғәҙәттән тыш хәлдәр министрлығының профессиональ ҡотҡарыу һәм эҙләү подразделениеларында «Асыҡ ишектәр көнө» уҙғарыласаҡ. Айлыҡ 4 октябргә тиклем дауам итәсәк.
Башҡортостанда вакансиялар банкы тулылана башлаған. 31 авгусҡа ҡарата, йыл башы менән сағыштырғанда, вакансиялар иҫәбе 2,3 тапҡырға артҡан һәм 28,8 мең тәшкил иткән, көсөргәнешлек коэффициенты хеҙмәт баҙарында 3,6-нан 1,3-кә тиклем кәмегән. Ағымдағы йылда Республика халыҡты эшкә урынлаштырыуға булышлыҡ итеү буйынса өҫтәмә саралар программаһын ғәмәлгә ашырыуға 613 миллион һумдан ашыу аҡса бүленгән, шул иҫәптән республика ҡаҙнаһынан 39 миллион һум йүнәлтелгән.
Был аҙнала көндәр һыуытасаҡ, ҡырау төшөүе ихтимал. Төндә төньяҡ райондарҙа температураның – минус биш, Өфөлә минус ике градусҡа тиклем түбәнәйеүе мөмкин. Көндөҙ һауа температураһы 9 – 14 градус йылы буласаҡ, урыны менән ҡыҫҡа ваҡытлы ямғыр яуыуы көтөлә.
Р. КҮСЕМХАНОВА әҙерләне.