22.11.2013 Мәҙәниәт йылының эмблемаһы раҫланды

2014 йыл Башҡор­тос­танда Мәҙәниәт йылы тип иғлан ителде. Ошоға бәйле иғлан ителгән иң яҡшы эмблема конкурсына йом­ғаҡ яһалды. Комиссия барлығы 50 эш ҡабул итте, авторҙар араһында профессиональ рәс­самдар, ябай граждандар, хатта балалар ҙа бар ине.
Республикабыҙҙың мәҙәниәт министры Әминә Шафиҡова етәкселек ит­кән комиссияла эштәрҙе Б­Р-ҙың атҡаҙанған рәссамдары Әмир Мәжитов, Хатип Фазылов, Ғ. Сәләм исемендәге премия лауреаты Тәлғәт Мәсәлимов, БР-ҙың атҡаҙанған матбуғат һәм киң мәғлүмәт саралары хеҙмәткәре Нә­сих Хәлисов баһаланы. Шулай итеп, Азат Фәй­зиевтың (Өфө ҡалаһы) мәғәнәле, аңлайышлы булыуы, сағыулығы һәм ыҡсымлығы менән айырылып торған эмблемаһы иң яҡшы эш тип табылды. Жюри ағзалары үҙ-ара кәңәш иткәндән һуң Азат Хәмзә улына ҡайһы бер деталдәрҙе урын-еренә еткереп эшләргә ҡушты. Осона сыҡҡандан һуң эмблема Мәҙәниәт йылын уҙғарыу буйынса комитет­ҡа тапшырылды һәм уны БР Хөкүмәте Премьер-ми­нистры урынбаҫары Лилиә Ғүмәрова раҫланы.
Эмблеманың композиция структураһы һәм элементтары төрлө сәнғәт төрҙәрен сағылдыра. Театр колоннаһы формаһында үтәлгән эмблеманың төҫ палитраһы һынлы сәнғәтте, ноталарҙы һәм ҡурай сәскәһен символлаштыра. Автор аңлатыуынса, бында ете элемент – ете йәйғор төҫө (күрәбеҙ), ете нота (ишетәбеҙ), милли һәм республика символы булған ҡурай сәскәһе (тоябыҙ).
Еңеүсе – “Эврика. Ҡайҙа уҡырға барырға?” журналының мөхәррире Азат Фәйезов 40 мең һумлыҡ аҡсалата бүләккә лайыҡ булды.

Л. ҺИҘИӘТОВА.