27.09.2013 Парижда – Башҡортостан тураһында

Октябрҙең тәүге көндәрендә Францияның баш ҡалаһы Парижда ЮНЕСКО-ның штаб-фатирында Башҡортостанға арналған бер нисә сара үтәсәк. Осрашыуҙар, кисәләр, концерттар, күргәҙмәләр беҙҙең республиканың ЮНЕСКО менән хеҙмәттәшлегенә 15 йыл тулыуға арнала.
Презентацияла республикабыҙ ха­ҡында бай экспозиция менән танышыр­ға мөмкин буласаҡ. Бында үҙенсәлекле тәбиғи һәйкәлдәр ҙә, күп яҡлы мәҙәни һәм рухи ҡомартҡылар ҙа телгә алына. Бынан тыш, ҡунаҡтар ЮНЕСКО-ның “Башҡорт Уралы” биосфера резерваты, үҙ эсенә Шүлгәнташ мәмерйәһен алған “Урал батыр төйәге” тәбиғи ҡомартҡыһы хаҡында ла етерлек мәғлүмәт алып, сағыу күренештәрҙе тамаша ҡыла аласаҡ.
Еребеҙҙең йәнә бер тарихи байлығы – “Урал батыр” эпосын был саранан бер нисек тә ситтә ҡалдырып булмай. Ул билдәле донъя эпостары рәтендә йөрөргә хоҡуҡлы. Финдарҙың “Калевала”, немецтарҙың ”Песнь о Нибелунгах”, ҡырғыҙҙарҙың ”Манас”ы кеүек берҙәй боронғо ул башҡорт эпосы.
Башҡортостан менән таныштырыуҙың төп маҡсаты – республиканың күп яҡлы потенциалын донъяға, киң йәмәғәтсе­лек­кә тәҡдим итеү. “Урал батыр төйәге” тәбиғи-мәҙәни номинацияһын ЮНЕСКО-ның донъя мираҫтары исемлегенә индереү тураһында ла һөйләшеү күҙаллана.
ЮНЕСКО майҙансығындағы Баш­ҡортостан көндәренә ойошма ағзаһы булған 195 илдең вәкилдәре килеүе көтөлә.