01.11.2013 Абруйлы премия – лайыҡлыларға ғына
Шәһит Хоҙайбирҙин исемендәге хөкүмәт премияһы лауреаттарын бүләкләү тантанаһы, традицияға ярашлы, Күгәрсен районында үтте. Награданы тапшырыуҙа БР Хөкүмәте Премьер-министры урынбаҫары Лилиә Ғүмәрова, Матбуғат һәм киң мәғлүмәт саралары буйынса агентлыҡ етәксеһе Борис Мелкоедов, Журналистар оюзы рәйесе Артур Дәүләтбәков ҡатнашты.
БР Хөкүмәте ҡарамағындағы журналистика өлкәһендә Шәһит Хоҙайбирҙин исемендәге премияларҙы биреү буйынса комиссия абруйлы премияға 12 кешенән өс журналисты лайыҡлы тип тапты. Лауреаттар – «Өмет» республика йәштәр гәзитенең баш мөхәррире Рәдис Ноғоманов, «Башҡортостан» дәүләт телерадиокомпанияһы журналисы Зөлфиә Рәхмәтуллина һәм «Башҡортостан» республика гәзите фотохәбәрсеһе Айрат Нурмөхәмәтов. Ә Күгәрсен районының Шәһит Хоҙайбирҙин исемендәге премияһы журналист Сәрүәр Суринаға бирелде.
Премия лауреаттарына наградаларҙы комиссия рәйесе Лилиә Ғүмәрова тапшырҙы. Ул еңеүселәрҙе Президент Рөстәм Хәмитов исеменән ихлас ҡотланы һәм уларға яңы ижади уңыштар теләне. Күгәрсен районы хакимиәте башлығы Фәрит Мусин да ҡотлау телмәре менән сығыш яһаны. Бүләкләнеүселәр ҙә, үҙ сиратында, хеҙмәттәрен юғары баһалағандары өсөн рәхмәтен еткерҙе.
Л. ҺИҘИӘТОВА.
Оҡшаш яңылыҡтар
