21.02.2014 Халыҡ дауаһы

Аяҡтар шешенгәндә

Аяҡтарҙың шешенеүен нисек дауаларға? Халыҡта бының ябай ғына ысулы бар. Төнгөлөккә аяҡтарҙы һыуыҡ һыуға мансылған кизе-мамыҡ туҡыма менән урап ятырға кәрәк (һыуыҡ һыуға манып һығылған ойоҡ кейһәң, тағы ла яҡшыраҡ). Өҫтөнән йөн шарф менән бәйләп, аяғығыҙға башалтай кейеп ятһағыҙ, таңғы сәғәт 5-тәр тирәһенә ул ҡоп-ҡоро буласаҡ. Шул рәүешле бер ай дауам итегеҙ һәм бер айға туҡтатып торорға ла тағы дауаланыуҙы башлағыҙ. Бер аҙнанан уҡ дауалауҙың һөҙөмтәһе күренәсәк. Ә инде дауаланыу курсын тамам­лау­ға аяҡ шешенеүҙең ни икәнен дә белмәҫһегеҙ.

Ир-егеттәргә ярҙамға

Башлы һуған, көнбағыш, сәтләүекте бер ай буйы ҡулланыу простатиттан ярҙам итә. Беренсе көндә, киске аштан һуң 2 – 3 сәғәт үткәс, бер баш һуған ашарға кәрәк, иртәгәһенә – ярты стакан көнбағыш, өсөнсө көнөнә – ярты стакан әстерхан сәтләүеге. Артабан ошо схема буйынса дауам итегеҙ. 2 – 3 айҙан һуң табипҡа барып тикшерелгәндә, һөҙөмтәне үҙегеҙ күрерһегеҙ.
Ғәҙәттә, кишер япрағын ашамайбыҙ. Әммә кишергә ҡарағанда уның япрағында селен күберәк. Көнөнә салатҡа йәиһә ашҡа ҡушып бер генә йәш япраҡты ашаһаң да, организм өсөн кәрәкле бер көнлөк норма килеп сыға. Ә кишер япрағы төнәтмәһе бөйөр ауыртҡанда организмдағы артыҡ һыуҙы ҡыуҙыртыу өсөн файҙалы, шулай уҡ геморройҙан да ярҙам итә. 2,5 ҡалаҡ япраҡ онтағын 0,5 литр ҡайнар һыуға һалып, таҫтамал менән урап 3 – 4 сәғәт тотор­ға. Һуңынан сәй урынына берәр стакан эсергә мөмкин. Төнәтмәне һыуытҡыста ике тәүлек һаҡларға була.

Ҡулдарығыҙ шыма булһын тиһәгеҙ

Берәр балғалаҡ юл япрағы, аҡсәскә һәм бөтнөк япрағын 1 стакан һыуҙа ҡайнатырға. Тән температураһына тиклем һыуыт­ҡан­дан һуң шунда ҡулдарығыҙҙы йыуығыҙ. Һуңынан ҡулығыҙға әҙ генә персик йәиһә абрикос майы һөртөп, массаж эшләгеҙ. Был процедураны бер ай буйы иртәле-кисле эшләргә онотмағыҙ.