08.11.2011 Тәнәфес файҙаға булыр, моғайын

Хоккей буйынса 11–13 ноябрҙә буласаҡ Евротурҙың тәүге этабы алдынан «Салауат Юлаев» хоккейсылары өс осрашыуҙы үҙ майҙанында уҙғар­ҙы. Беренсе уйында чемпионат аутсайдерын буллит серияһында көскә 4:3 иҫәбенә отҡас, баш тренерыбыҙ Сергей Михалевтың отставкаға китеүе хаҡында билдәле булды. Уның ярҙамсыһы Сергей Герсонскийҙан да баш тарттылар.
Икенсе бәйгелә өфөләргә ҡаршы беренселек лидерҙарының береһе – Силәбенең «Трактор»ы сыҡты. Был юлы юлаевсыларҙы уйынға билдәле тәрбиәләнеүсебеҙ, заманында һаҡсы булған, ә инде хәҙер ун йылға яҡын тренерлыҡ тәжрибәһе туплаған Венер Сафин сығарҙы. Күрәһең, клуб эсендәге ошо үҙгәреш осрашыуға йоғонто яһамай ҡалмағандыр. Сөнки «Салауат Юлаев» командаһы дөйөм коллектив булып, ҡунаҡтарға тын алырға ла ирек бирмәне. Уларҙың ҡапҡаһына дүрт яуапһыҙ шайба индереп, быйылғы миҙгелдә лайыҡлы рәүештә еңде, тиһәк тә, шаштырыу булмаҫ. Шулай итеп, «ҡара» октябрҙән һуң өфөләрҙең аҡ көндәре тыуыр, тигән өмөт уянғайны. Тәнәфес алдынан Астананың «Барыҫ» командаһы менән осрашыу булды. Улар ҙа һуңғы арала яҡшы ғына тиҙлек алып, дүрт уйын рәттән еңелеү белмәй.
Хужалар беренсе булып иҫәпте асһа ла, ҡаҙағстан ҡунаҡтары ике шайба менән яуап бирҙе. Һуңғы осорҙа 2:3 иҫәбенә еңелеп килгәндә лә, осрашыуҙы ҡотҡарыу түгел, еңеп тә була ине әле. Юҡ шул. Тәжрибәле һаҡсыбыҙ Виталий Прошкиндың хатаһы йәнә иҫәпте арттырыуға булышлыҡ итте. Кәйеф һүрелде, өмөт юҡҡа сыҡты. Сөнки уйынды ҡотҡарырға ваҡыт та ҡалмағайны. Алда тәнәфес, бәлки, ул файҙаға ғына булыр, тигән өмөттәбеҙ. Ә әлегә юлаевсылар, 23 уйындан һуң 31 мәрәй яулап, турнир таблицаһының 13-сө баҫҡысында. Юғарыла – СКА. Уның иҫәбендә – 48 мәрәй. «Амур» менән «Трактор» 44-шәр мәрәй менән 2 – 3-сө урындарҙы бүлешә.
Н. ТИМЕРОВ.