12.11.2011 Республика башлығы драматург Нәжиб Асанбаевты 90 йәше менән тәбрикләне
Ошо көндәрҙә билдәле драматург, Башҡортостан Республикаһының халыҡ яҙыусыһы Нәжиб Асанбаев 90 йәшен билдәләне. Әҙиптең оло юбилейы айҡанлы республикала бихисап сара уҙғарылды. Ә баш ҡалала 2 − 8 ноябрҙә театр фестивале үтте. Уның сиктәрендә Өфө сәхнәләрендә Нәжиб Асанбаевтың драмалары ҡуйылды. Әйтергә кәрәк, был сараларҙы халыҡ яратып ҡабул итте. Нәжиб Асанбаевтың геройҙары тормошҡа яҡын, шуның өсөн дә тамашасылар уларҙы үҙ итә. Башҡорт дипломаты Кәрим Хәкимов һәм билдәле ғалим Әхмәтзәки Вәлидиҙең яҙмышы беҙҙең башҡорт театрын бар донъяға билдәле итте.
9 ноябрҙә М. Ғафури исемендәге Башҡорт дәүләт академия драма театрында Нәжиб Асанбаевтың юбилей кисәһе уҙғарылды. Әҙипте ҡотларға Башҡортостан Президенты Рөстәм Хәмитов та килгәйне. Рөстәм Зәки улы Нәжиб Асанбаевтың республика мәҙәниәтенә индергән тос өлөшөн юғары баһаланы һәм «Башҡортостан Республикаһы алдындағы ҡаҙаныштары өсөн» орденын тапшырҙы. Олуғ әҙипкә шулай уҡ «Татарстандың атҡаҙанған мәҙәниәт хеҙмәткәре» исеме бирелде.
Юбилярға сәләмәтлек, рух ныҡлығы, ижади уңыштар теләйбеҙ.
Оҡшаш яңылыҡтар
15.08.2019 - Мәҙәниәт һәм сәнғәт Рәсәйҙең атҡаҙанған мәҙәниәт хеҙмәткәре Рәйес ИСМӘҒИЛЕВ: “Һуғыш суҡмары булдым”
20.04.2019 - Мәҙәниәт һәм сәнғәт Башҡортостандың атҡаҙанған артисы Лилиә РӘСҮЛЕВА: «Күңелем романтикаға тартыла»
