18.12.2010 Матбуғат балы «Үҙгәрештәр еле» аҫтында үтте

Үткән шаршамбы республика баҫмаларында эшләүселәр өсөн ике ваҡиға – көндөң тәүге яртыһында республика һәм район баҫмалары етәкселәре коллегияһы һәм унда күтәрелгән мәсьәләләр, икенсе яртыһында баш ҡаланың Рус дәүләт драма театрында ойошторолған традицион «Матбуғат балы – 2010» менән иҫтәлекле булды.
Коллегияла элемтә һәм киң коммуникациялар министры Борис Мелкоедов яңы ойошторолған министрлыҡтың 90 процентҡа формалашыуын һәм эшен яңы форматта дауам итергә әҙер булыуын белдерҙе һәм тыңлаусыларға яҡын киләсәктә матбуғат өлкәһен дә реформалар көтөүе тураһында еткерҙе. Уның фекеренсә, яңы шарттарҙа дәғүәселеккә һәләтлекте арттырыу, баҫмаларҙы уҡымлыраҡ итеү өҫтөндә эшләргә кәрәк.
Министр үҙенең яңы урынбаҫары Марат Ғәзизов менән таныштыр­ҙы. Ул үҙенең сығышында маҡсатлы аудитория, уҡыусылар менән эшләү мөнәсәбәттәренә ҡағылды. Уҡыусыларҙы һаҡлап ҡалыу проблемаһын хәл итеү өсөн яңы урынбаҫар гәзит-журналдарҙың сифатын яҡшыртыу, яңылыҡтар­ҙы оператив еткереү, уҡыу­сылар менән һәр ваҡыт бәйләнештә булыуҙың мөһимлегенә баҫым яһаны.
Ул журналистика кадрҙарын әҙерләү мәсьәләһен дә күтәреп сыҡты. Уныңса, бөгөн журналистар әҙерләү мәсьәләһе түбән кимәлдә. Был хәлде төҙәтеү өсөн министрлыҡҡа журналис­тар­ҙың квалификацияһын күтәреү курсын ойоштороу ихтыяжы бар.
Министр урынбаҫары Венера Хәкимова үткән туғыҙ айлыҡ эш йомғаҡтары һәм киләсәккә пландар менән таныштырҙы.
Ултырышта «Башинформ» мәғлүмәт агентлығының генераль директоры Максим Ульчев үҙҙәренең сайтында ойошторолған республика һәм район баҫмаларына яҙылыуҙағы яңы алымдар хаҡында һөйләне.
Көндөң икенсе яртыһына тәғәйенләнгән республика журналистарының быйылғы эшмәкәрлегенә йомғаҡ яһаусы тантаналы сара «Үҙгәрештәр еле» тип аталды һәм унда заман елдәре менән бергә атлаусы, тормошобоҙҙағы һәр яңы йүнәлеште һәм үҙгәреште ҡыйыу яҡтыртыусы баҫмалар коллективтары һәм журналистары бүләкләнде. Әйтергә кәрәк, бындай тантана Башҡортостанда бишенсе йыл рәттән үткәрелә. «Йәшлек»тең дә унан бер ҙә ситтә ҡалғаны юҡ – төрлө номинацияларҙа лайыҡлы баһаһын ала. Быйыл, мәҫәлән, беҙҙең баҫма «Алтын ҡаурый» премияһына лайыҡ булды. Әйткәндәй, был номинация республиканың Журналистар сою­зы инициативаһы менән быйыл тәүгә булдырылды һәм федераль баҫмаларҙың төбәк ҡушымталары, Башҡортостанда сыҡҡан 15 баҫма ошо юғары премияға лайыҡ тип табылды.

Гәзитебеҙҙең тағы ла бер еңеүе: журналисыбыҙ Рәшиҙә Мәхийә­нова Бөтә Рәсәй «Рә­сәйҙең иҡтисади тергеҙелеүе» конкурсының төбәк этабында лауреат исеме алды.
Быйыл сара уны ойоштороусылар иҫәбендә БР Элемтә һәм киң коммуникациялар министрлығының ғына түгел, ә Башҡортостан Прези­дентының матбуғат хеҙмәте лә булыуы, шулай уҡ «Сала­уатнефтеоргсинтез» компанияһының генераль партнер һәм «Башкирэнерго» асыҡ акционер­ҙар йәмғиәтенең рәсми партнер булып сығыш яһауы, «Кламас» компанияһының техник яҡтан ярҙам күрһәтеүе, 2brands коммуникациялар студияһының проект координаторы ролен үҙ өҫтөнә алыуы менән мәртәбәлегә әйләнде. Ә номинацияларҙың төрлөлөгө журналистар араһында еңеү­селәр­ҙең күп булыуын билдәләне. Мәҫәлән, Респуб­лика йылына, Бөтә Рәсәй халыҡ иҫәбен алыуға, комсомолдың 90 йыллығына, наркотиктарға ҡаршы көрәшкә һәм башҡа темалар­ға арналған конкурстар үҙ еңеүселәрен атаны. Шуныһы айырым иғтибарға ла­йыҡ: был юлы әүҙем блогерҙар ҙа билдәләнде һәм улар «Кла­мас» компанияһының махсус бүләктәренә лайыҡ булды.
Тантанаға йыйылыусыларҙы элемтә һәм киң коммуникациялар министры Борис Мелкоедов, уның урынбаҫары Венера Хәкимова, БР Президенты Хакимиәте етәксеһе урынбаҫары Ростислав Мырҙағолов тәбрикләне һәм үҙ теләктәрен еткерҙе.
– Барыбыҙ ҙа гражданлыҡ йәмғиәтен булдырыуға, ирекле киң мәғлүмәт сараларына иҫәп тотабыҙ. Әммә иреклелек иртәнән кискә тиклем бысраҡ яғыу тигән һүҙ түгел. Иреклелек – ул киң мәғлүмәт сараларының үҙ фекерен әйтә алыу хоҡуғы, улар­ҙың кешеләргә ҡы­ҙыҡлы булыуы, влас­тарҙың ҡарарҙар ҡабул итеү эшендә ҡатнашыуы, – тине үҙ сығышында Рос­тислав Рәфҡәт улы.
Уныңса, дәүләт ҡарамағында булмаһалар ҙа, киң мәғлүмәт сараларына дәүләт ярҙамы һаҡланып ҡалырға, журналистар хеҙмәтенә ихтыяж артырға, уларҙың хеҙмәт хаҡы бөгөнгөгә ҡарағанда ҙурыраҡ булырға тейеш.
Борис Мелкоедовтың әйткән һүҙҙәре лә ҡәләм эйәләренең күңелен үҫтерҙе: журналистарҙың һәйбәт эш хаҡы алыуы өсөн министрлыҡ та тырышлыҡ һаласаҡ.
ҡотлауҙар баш ҡала йәштәренең заманса бейеү ансамблдәре һәм «Шоколад» вокаль-инструменталь төркөмөнөң сығыштары менән үрелеп барҙы.
«Матбуғат балы» унда ҡатнашыу­сыларға өҫтәмә дәрт һәм илһам бирҙе.

Р. МӘХИЙӘНОВА.
Ю. КӘРИМОВ фотолары.