18.10.2019 Яңы һанға күҙәтеү

“Йәшлек” гәзитенең 42-се һанына күҙәтеү

2018 йылдың тәүге көндәренән үк “Йәшлек” гәзите редакцияһы мөхәрририәте Башҡортостандың Яҙыусылар союзы һәм Зәйнәб Биишева исемендәге “Китап” нәшриәте менән берлектә Мостай Кәрим исемендәге әҙәби конкурс иғлан иткәйне. Халыҡ шағирының 100 йыллыҡ юбилейын билдәләгән көндөрҙә конкурсҡа йомғаҡ яһалды. ”Йәшлек”тең был һаны ошо яңылыҡ менән асыла. Кемдең еңеүсе булыуын гәзитте уҡып белерһегеҙ.
Ил президентының мосолман иленә сәфәре тураһында Алһыу Ишемғолова “Сәйәсәт кенә түгел” рубрикаһында бәйән итә. Мәктәптәрҙә туҡланыу тураһында бәхәстәр ҡыҙа бара. Хатта республика Башлығының был мәсьәләне күҙәтеүгә алыуы ла хәлде әлегә үҙгәртә алмай шикелле. Уҡыусы балалар һәм ата-әсәйҙәр туҡланыуҙан ҡәнәғәтме? “Көнүҙәк мәсьәлә” рубрикаһы бөгөн шул һорауға яуап эҙләй.
“Баймаҡтарға – афарин!” тип яҙа хәбәрсебеҙ Айбулат Ишназаров. Сөнки районда үткән Матбуғатҡа яҙылыу көнө һәм ауыл хужалығы йәрминкәһендә беҙҙең дуҫтар тағы ла артҡан! Ошо һәм башҡа материалдарҙы уҡып, яҙылыусыларыбыҙ гәзиттең яңы һанынан илһам, белем, рух күтәренкелеге туплар, тип өмөтләнәбеҙ!