31.12.2018 2019 йылдың символы һары Ер Ҡабаны буласаҡ

Яңы йыл – һәр саҡ ниндәйҙер мөғжизә,теләктәрҙең тормошҡа ашыуын көтөү, бала саҡтан иң яратҡан байрамдарҙың береһе. 2019 йыл һары Ер ҡабаны йылы буласаҡ. Көнсығыш философияһына ярашлы, был йылды нисек ҡаршыларға?

Ҡабан – тыныслыҡ яратыусы, үҙ көйөнә йәшәүсе хайуан. Шуға ла йыл тыныс үтер, тип көтөлә. Карьера һәм бизнес, ғаилә һәм мөхәббәт өсөн уңышлы йыл буласаҡ. Үҙ маҡсаттарын эҙмә-эҙлекле алып барғандарға ла яҡты йөҙ күрһәтәсәк.

Был йылда тыуған кешеләр аҡыллы, белемле, һығылмалы, күҙәтеүсән һәм энергияға бай. Ҡабандарҙы аңлауы еңел түгел, сөнки улар – үҙ-үҙҙәренә ҡаршы килеүсе натуралар. Барыһын да тиҙ генә аңлап башҡаралар, бер нисә эште һәм бурысты бер юлы алып барырға һәләтлеләр.

Шул уҡ ваҡытта улар эгоистар, тик үҙ проблемалары менән генә етди шөғөлләнәләр, күңелендәген асып һалырға ашыҡмайҙар. Был билдә аҫтында тыуыусылар ныҡлы рухлы һәм көслө характерлы. Ҡайһы берҙәре уйламаған аҙым яһап та үҙ репутацияһын һаҡлап алып ҡала. Улар яңғыҙлыҡты яртмай.

Яңы йылды нисек ҡаршыларға?

Уҙып барыусы Эт йылына рәхмәтегеҙҙе әйтеп, иң бәхетле миҙгелдәрегеҙҙе иҫегеҙгә төшөрөгөҙ . Яңы йыл куранттары һуҡҡас, киләһе йылда тормошҡа ашырырға теләгән хыял- ниәттәрегеҙҙе күҙ алдына килтерегеҙ һәм уларҙың ҡабул булыуын, уҙған йылдағы күңелһеҙ ваҡиғаларҙың артта ҡалыуын, онотолоуын теләгеҙ.

Яңы йыл байрамын ҡаршылағанда быйыл һары, алтынһыу, көрән йәки һоро төҫтәге кейем әҙерләргә кәңәш ителә. Шулай уҡ ҡыҙғылт-һары, кофе, терракота, аҡһыл көрән төҫөндәге күлдәктәр ҙә ярай. Ә ир-аттарға ошо төҫтәрҙең береһендәге галстук тағыу ҡулай буласаҡ.
Байрам табынында мандарин һәм әфлисундар булырға тейеш. Бәшмәкле һәм сәтләүекле ҡабымлыҡтар, ыуылдырыҡ менән бутерброт­тар яһарға мөмкин. Сусҡа ите өҫтәлдә булырға тейеш түгел.