23.08.2011 Ҡомһоҙҙар һаман кәмемәй

Аҙна һайын ришүәт алып тотолоусы чиновниктар тураһындағы яңылыҡтар ирекһеҙҙән, быларҙың барыһы ла бер һап та бер ҡап, тип уйлар­ға мәжбүр итә. Әле совет заманында ауылдарҙа халыҡ әйтеменә әйләнеп киткән «Кем уғры – шуның ҡапҡаһы менән ҡоймаһы бейек» тигән һүҙ йөрөй торғайны. Хәҙер иһә был әйтемде әҙерәк үҙгәртергә мөмкин: кем ришүәтсе – шуның ҡәлғәһе текәрәк.
Ябай кеше ришүәтсе була аламы? Был һорау хатта урынһыҙ ҙа кеүек: ҡулында власть булмаған кешегә кем һәм ни өсөн ришүәт бирһен, ти! Ә бына власта ултырыусылар, закондарҙы үҙ файҙаһына оҫта файҙаланыусылар өсөн беҙҙең коррупция һаҙлығына батҡан власть системаһы, камил булмаған закондар бик ҡулай һәм намыҫын кер ҡаплағандарҙы үҙе үк енәйәткә этәрә. Әле бына ошо көндәрҙә республиканың Ауыл хужалығы министрлығы чиновнигы ла шундай енәйәт өҫтөндә тотолған: полиция хеҙмәткәрҙәре уны баш ҡаланың Пушкин урамында бер төҙөлөш ойошмаһы вәкиленең уның ҡулына 500 мең һум тотторған сағында ҡулға алған. Был аҡса, баҡһаң, уға тапшырылырға тейеш булған сумманың өстән бер өлөшөн генә тәшкил иткән.
Тәүге мәғлүмәттәр буйынса, 56 йәшлек чиновник дәүләт заказы буйынса «Рощинский» совхозында төҙөлөш эштәре алып барған яуаплылығы сикләнгән йәмғиәткә документтарҙы ваҡытында әҙерләп биреүгә тырышлыҡ һаласағы өсөн миллион ярым һум аҡса һораған.
Ришүәтселәр өҫтөнән бер-бер артлы суд үтеп тора, әммә ҡомһоҙҙар һаман кәмемәй.