07.02.2014 Чебурашка аша

Апайымдар Ырымбур ҡалаһында йәшәй­. Ҡыҙҙары студент сағында үтә ябыҡ булды. Бер ваҡыт апайымдың Федоровка районының Юлдаш ауылынан Ырымбурға шәл һатырға килгән килендәше, ҡыҙҙы йәлләп, былай тигән: «Зөлфиә, бигерәк ябыҡһың да инде. Ни эшләп бер нисә Чебурашка һатып алып булһа ла ашамайһың?»

40 көнлөк колготки

Иптәшем баҙарға йыйынғас, капрон колготки алып ҡайтырға ҡуштым. Ул йомошомдо үтәгән. “Ҡатын, тик был һиңә ҡырҡ көнгә генә етәсәк”, – тип миңә ҡап һуҙа. Ҡараһам, унда 40 ден тип яҙылған. Уларҙың бит 70 көнгә лә етерлеге бар, ниңә шуныһын алманың, тип шаярттым. Иремә ден тигән һүҙҙең колготкиҙың ныҡлығын күрһәткәнен аңлатып бирергә тура килде.
“Продажная шкура”

Был хәл 1968 – 1970 йылдар тирәһендә булды. Атайымдың Парадеево ауылынан (Ырымбур өлкәһендә) һатып алған туны бар ине.
Бер көн атайым иптәше менән ҡырын тейәп алған. Әсәйем ҡайтыу менән тупһанан уҡ уны ошаҡлап ҡуйҙым. Атайым, йәне көйөп, миңә: “Продажная шкура”, – тине. Мин бала ғынамын, рус телен насар беләм, шулай ҙа шкура һүҙен аңланым. Үҙемсә, “Парадеевская шкура” тип уйланым һәм атайҙың әлеге тунын килтереп тотторҙом. Ул көлөп ебәрҙе лә: "Продажная шкура һатлыҡ йән була", – тип аңлатты.

Г. НАСИРОВА.
Стәрлебаш районы,
Мырҙаш ауылы.